Бу атнада зурлар һәм мәктәпкә әзерлек төркемендә "Куркынычсызлык" проекты буенча, кеше тормышы өчен куркыныч ситуацияләр турында әңгәмәләр үтте. Үз һәм тирә-яктагыларның тормышы өчен уяу булырга, кагыйдәләрне дөрес үтәргә кирәклеге турында искәртелде. Террорчылыкка каршы рәсем күргәзмәсе оештырылды. 

Бүген Бөрбаш балалар бакчасында "Куркыныч" сүзенең мәгънәсен аңлату максатыннан, нәниләр төркеме тәрбиячесе Гөлнур Самигулловна балаларга "ярый -ярамый" сүзенең төшенчәсен аңлатты.

ТНВ каналының "Халкым минем" тапшыруы хәбәрчеләре безнең авылда кунакта булды. Авылның күренекле кешеләре белән беррәттән, алар бакчабызны да, анда тәрбияләнүче балаларны да  төшерделәр.  Мөдиребез Розалия Харисовна бакча тормышы белән таныштырды, зурлар төркемендә тәрбияләнүчеләр кунакларны "Әссәләмәгәләйкүм" җыры белән каршылады, аннан соң "Салават" әйтелде,  нәниләр төркеме тәрбиячесе Гөлфия Хәйдәровна балалар белән саф һавада уеннар оештырды. 

Түгәрәккә бас тизрәк,

Биеп алыйк без әзрәк.

Уйнап-көлеп, җырлап-биеп

Үсеп җитик без тизрәк!

Иртән уянып, сөенеп-көлеп,

Ашыга-ашыга бакчага килдек.

Сәламләштек без, аннан күрештек,

Елмаешып бергә тезелдек. 

Бакчабыз мөдире Розалия Харисовна "Мәктәпкәчә белем бирүнең нәтиҗәле муниципаль моделен формалаштыру: тәҗрибә һәм перспективалар" темасына август киңәшмәсендә чыгыш ясады. 

Балаларда көндәлек хәрәкәт эшчәнлегенә ихтыяҗ формалаштыруны җәйге саф һавада сәламәтлек сукмагында дәвам итәбез. Сәламәтлек сукмагында йөргәндә балаларның табан астына алган массаж акыл эшчәнлегенә, сөйләм үсешенә, хәрәкәт координациясенә, гәүдә тотышына күп файда бирә. Ихтыяр көче, сабырлык, кыюлык, мөстәкыйльлек  кебек сыйфатлар тәрбияләнә; иптәшләре алдында җаваплылык хисе тоярга да өйрәнәләр.

Ел саен бакчабыз территориясен бизәүгә әти-әниләр һәм хезмәткәрләр күп көч куя. Быел Исрафилов Фәнил ясаган кое бакчабызга матур бер ямь биреп тора.

Бакчабызда сөенеч!

Бүген яңалар килде.

Игезәк, матур кызларыбыз -

Дилия белән Зилиягә

Һәммәбез дә сөенде.