Уртанчылар төркемендә "Икмәк - ил тоткасы" проектын тәмамлап, әниләр тозлы камырдан төрле татар халык ашлары ясап алып килделәр. Аларга зур рәхмәтебезне белдерәбез.

Уртанчылар төркемендә "Сөмбелә бездә кунакта" дип исемләнгән бәйрәм иртәсе үткәрелде. Балалар бу чарадан бик канәгать булдылар. 

Матур шигырьләр, җыр-биюләр өйрәнеп көз кызы Сөмбеләне каршыладык. Аңа үзебезнең җирлектә үсүче яшелчәләр турында белгәннәребезне сөйләдек, юмарт көз кызына рәхмәт әйттек. 

Көзге ярминкәдә безнең  коллектив та катшашты. Бакчабызда үстерелгән яшелчәләрне, алардан әзерләнгән салатларны тәкъдим иттек. 

Бүген нәниләр төркемендә "Көз белән бергә" исемле бәйрәм иртәсе булды. Балалар бу иртәдә көз турында күзаллауларын тирәнәйттеләр, белемнәрен ныгыттылар. 

5 октябрь - Укытучылар көне уңаеннан мәктәпкә әзерлек төркемендәге балалар тәрбияче апалары белән мөгаллимнәрне котладылар. Аларга җылы сүзләрен, изге теләкләрен җыр һәм бию белән үреп бүләк иттеләр.

Әле бер ай элек кенә ТНВ ның "Халкым минем" тапшыруында безнең Бөрбаш балалар бакчасыннан матур сюжет әзерләнеп күрсәтелгән иде. Бу атнада "Татарлар" тапшыруында күргәзмәдәге экспонатларны һәм балалар белән хәзерләнгән "Бәби ашы" күренешен тәкъдим иттеләр. 

Районда уздырылган "Бәби ашы" конкурсы бакчабызның якты йолдызы, сәләтле баласы Әдел Корбангалиев башкаруында "Туган тел" җыры белән тәмамланды. Яшь җырчыга киләчәктә дә зур өметләр баглыйбыз. 

Балаларның көзге бакчада өлгергән яшелчәләр һәм җиләк-җимешләр турында алган белемнәрен гомумиләштерү максатыннан,  нәниләр төркеменә йөрүче балаларның әти-әниләре ясаган кул эшләреннән күргәзмә оештырылды.

Өлкәннәр көне уңаеннан уртанчылар төркемендә тәрбияләнүче балалар әби-бабаларына бүләккә үз куллары белән матур чәчәкләр ясадылар.