Бүген бакчабызда халкыбызның милли бәйрәме -  Сабантуй булды. Һәр бала үзенең осталыгын күрсәтте, көчен сынады, халык уеннарында бик теләп катнашты. Бәйрәмдә балалар рәхәтләнеп күңел ачтылар. 

Бүген зурлар һәм мәктәпкә әзерлек төркемендә  полиция хезмәткәре Раушания Ленаровна булып китте. Ул балаларны җәй көннәрендә аеруча сак булырга өндәде, куркынычсызлык кагыйдәләрен балалар белән бергәләп ныгыттылар. 

Бүген балалар бакчасында чыгарылыш кичәсе балалар, педагоглар, әти-әниләр күңелендә матур мизгелләр калдырды. Балаларның бәйрәмдә театральләштерелгән тамаша геройлары белән берлектә татар, рус телендә шигырьләр сөйләве, җырлавы, килешле итеп вальс әйләнүләре дә һәркемнең күңеленә хуш килде. Балалар үзләрен уңган, зирәк, акыллы итеп таныттылар. Бәйрәмдә сөенечле дә, моңсу да мизгелләр күп булды. Ак юллар сезгә, балалар! Сезне тылсымлы белем дөньясы көтә. 

Бүгенге көн нәниләр төркемендә "Көлке көне" дип билгеләп үтелде. Балалар кунакка килгән Убырлы белән бергәләп күңел ачтылар, уйнадылар. Ә Убырлы балалар белән рәхәтләнеп сөйләште, әңгәмә корды һәм сорау-җавап оештырды.  

Ямьле җәйне каршылап, бакча тирәсен төзәтү, буяу эшләре дәвам итә. Кече тәрбиячеләр бу хезмәттә башлап йөрүчеләр.

Ялдан килешләренә нәниләребезне язның беренче чәчәкләре күз явын алырлык лаләләр каршы алды.

Бүген нәниләр төркеме балалары, 19 май - Татарстан матбугаты көне уңаеннан, махсус балалар өчен чыгарыла торган журналлар белән таныштылар. "Салават күпере", "Сабантуй" журналлары балаларны матур рәсемнәре белән сөендерде. 

Язгы табигатьтәге үзгәрешләр белән таныштыру максатыннан, зурлар һәм уртанчылар төркеме балалары белән тау башына экскурсиягә бардык.

Зурлар төркемендә тәрбияләнүче нәни кызыбыз Корбанова Зифа Илнур Шакиров призына уздырылган шахмат ярышында II урынны яулап  диплом һәм  истәлекле бүләк белән бүләкләнде. Аңа алдагы ярышларда да зурдан-зур уңышлар телибез.

Балаларга әдәп-әхлак тәрбиясе бирү максатыннан, бүген нәниләр төркеме балалары белән саранлык сыйфатын уңайга үзгәртү, уйнаганда дус-тату, килешеп уйнауларын, бер-берләренә булышу теләге тудыру, сөйләмнәренә "Исәнмесез!",  "Сау булыгыз!", "Рәхмәт!" сүзләрен кертү, олыларга, әти-әниләргә карата ихтирам, олылар сүзен бүлдермәү, сабырлык тәрбияләү буенча сөйләшү үткәрелде.