Илебезгә Җиңү алып килгән 1945 нче елның языннан соң 70 ел вакыт үтеп бара. Бөек Ватан сугышы җиңүчеләре турындагы якты хатирәләр мәңгелеккә мәрмәр һәйкәлләрдә,  музей экспонатларында саклана. Әйе, тынычлык - һәркем өчен изге сүз. Укучылар  ясаган рәсемнәрдә дә җиңү өчен корбан булган солдатларны, тынычлык символларын күрергә мөмкин.

Бүген мәктәпнең спорт залы көн дәвамында гөрләп торды. Биредә Югары Курса, Урта Курса, Түбән Курса, Корайван, Сарай-Чокырча авылларының яшьләре волейбол уйнадылар. Уен бик җанлы узды. Югары Курса авылы яшьләре ярышларның җиңүчесе итеп билгеләнде. 2 нче  урында - Алан яшьләре, 3 нче урында-Корайван авылы командасы. Аларга Курса МТС ы җитәкчесенең бүләкләре тапшырылды.

Мәктәпнең "Туган якны өйрәнү музее" нда сугыш чоры белән бәйле материаллар бик күп. Бөек Җиңүнең 70 еллыгы уңаеннан укучылар әлеге альбомнардагы материаллар белән класс сәгатьләрендә танышалар, бабалары, авылдашлары, туганнары хакындагы язмаларны өйрәнәләр. 

Бүген мәктәптә пожарга каршы аңлату эшләре, әңгәмәләр булды, өйрәнү характерындагы эвакуация күнегүе уздырылды.

Март аенда район мәрхәмәтлелек үзәге Бөек Җиңүнең 70 еллыгына багышлап  "Бөек Җиңү юллары" дигән рәсемнәр һәм плакатлар конкурсы уздырган иде. Әлеге конкурста мәктәбебез укучылары да актив катнашты. 7 нче класс укучысы Минһаҗева Зиләнең рәсеме 3 нче урынга лаек булса, 1 нче класс укучысы Гарифуллин Галим  грамота белән бүләкләнде. Ике укучыга да истәлекле бүләкләр бирелде.

27 нче март көнне Казан шәһәренең Ф.Аитова исемендәге 12 нче татар гимназиясенә Туфан Миңнуллин истәлегенә багышланган укытучыларның һәм укучыларның II республика конференциясенең I турында җиңгән укучылар чакырылды. Мәктәпнең 7 нче класс укучысы Минһаҗева Зиләгә әлеге конференциядә катнашу бәхете елмайды.  "Журналистика. Кызыл тышлы дәфтәрдән". Җиңү тәрәзәләре" номинациясендә катнашучылар "ТАТМЕДИА" АҖ нә җыелды.Биредә аларны Татарстан Республикасы матбугат һәм массакүләм коммуникацияләр агентлыгы җитәкчесе урынбасары Сәгъдатшин Илдар Камил улы сәламләде. Укучылар өч төркем буенча чыгыш ясадылар. Аларның чыгышын КФУ профессоры Гарифуллин В.З., "Сөембикә" журналының әдәби редакторы Закирова Э.М., "Ялкын" журналының бүлек редакторы Фәйзуллина Л.Ф., "Шәһри Казан" газетасы корреспонденты Закиров Л.Р.составындагы жюри бәяләде. Укытучылар һәм укучылар төркемнәргә бүленеп "Мәгариф", "Гаилә һәм мәктәп", "Ялкын", "Сабантуй" журналларында кунакта булдылар, аларның эшләре белән таныштылар. Шунда ук Татарстан Республикасының танылган журналистлары белән очрашу да булды. Укучылар һәм укытучылар алдында "Ялкын" журналының баш редакторы Йолдыз Миңнуллина, "Сабантуй" журналының баш редакторы Айдар Гыймадиев, "Гаилә һәм мәктәп" журналының баш редакторы Закирова Гөлүсә Рәүф кызы, "Мәгариф" журналының баш редактор урынбасары Нурмөхәммәтов Фәрит Рәшит улы, шагыйрь Равил Фәйзуллин, "ТАТМЕДИА" АҖ нең генераль директорының киңәшчесе Римзил Вәлиев чыгыш ясадылар. Җиңүчеләрне бүләкләү тантанасы 12 нче гимназиянең актлар залында үтте. "Журналистика. Кызыл тышлы дәфтәрдән" номинациясендә Мингазова Зилә (җитәкчесе Садриева Н.З.) Татарстан Республикасы Мәгариф һәм Фән министрлыгының Дипломы белән бүләкләнде. Яшь каләмчегә иҗади уңышлар телибез!

Каникул вакытларында мәктәп спортзалында волейбол, баскетбол буенча тренировкалар уздырыла. Бүген 6-8 нче класс кызларыннан торган волейбол командасы белән Курса-Почмак мәктәбенең кызлар командасы арасында иптәшләрчә очрашу үтте.

Каникул көннәрендә 9 нчы класс укучылары график буенча имтиханнарга әзерләнәләр.

21 нче март көнне Урта Курса мәктәбе спортзалында Курса МТС ы җитәкчесе призына 2000-2001 нче елгы яшүсмерләр арасында татар-башкорт көрәше буенча район беренчелеге узды. Ярышны Арча районы башлыгының социаль мәсьәләләр буенча урынбасары Котдусов И.Ф. башлап җибәрде. Бәйгегә килүчеләргә мәгариф бүлеге начальнигы Дәүләтбаев З.М.,  баш хөкемдар Алиев Р.З., Курса МТС ы җитәкчесе Гыйләҗетдинов Р.Г., имам-хатиб Равил хәзрәт уңышлар теләде. Әлеге ярышта 18 командадан 68 яшүсмер катнашты. Алар 45, 50, 55, 60, 65, 70, 75, 80 һәм югары үлчәүдә көч сынашты. Бу ярышта командалар арасында 1 нче урынны Урта Курса мәктәбе (тренеры Лотфуллин М.Л.), 2 нче урынны Шушмабаш мәктәбе, 3 нче урынны  Ашытбаш мәктәбе командалары яулады. Шәхси беренчелектә үз үлчәүләрендә Абдуалимов О. 3 нче, Нурисламов Р. 2 нче, Шакиров Ә.  1 нче, Мөхәрләмов А. 1 нче урыннарга лаек булдылар.Җиңүчеләргә кубоклар һәм медальләр, грамоталар, Курса МТС ы җитәкчесе Гыйләҗетдинов Р.Г. исеменнән бүләкләр һәм абсолют батырга тәкә бирелде.

21 нче март көнне 2 нче сыйныф укучылары белән “Мин – пассажир”  темасына сыйныф сәгате үткәрелде. Юл кагыйдәләре искә төшерелде, авыр ситуациядән чыгу юллары эзләнде, видеоролик каралды, “Яхшы-начар” уены үткәрелде, карточкалар буенча “Тукта, синең тормыш куркыныч астында” темасына сорау-җавап эше үткәрелде. Уен формасында оештырылган сыйныф сәгатендә укучылар үзләрен  пассажирлар итеп тойдылар. “Юлда йөрү кагыйдәләрен онытма! Аларны һәрвакыт үтә!” дигән чакыру яздылар.