Мәктәбебездә 9 нчы класс укучылары өчен соңгы кыңгырау яңгырады. 9 нчы классны тәмамлаучы 10 укучы арасында мәктәп  тормышында актив катнашкан, спорт, уку  буенча зур уңышларга ирешкән укучылар да бар. Аларга изге теләкләрне мәктәп директоры Ф.М.Хәбибуллин, Арча районы мәдәният идарәсе җитәкчесе Мөхетдинов Р.Р., Урта Курса җирле үзидарәсе башлыгы Р.Р.Вафина җиткерде. Укучыларның вальс әйләнүләре, матур чыгышы бәйрәмгә ямь өстәде.

Узып китте мәктәп  елларыбыз

Ямансу да бүген, читен дә.

Шатлыгыбыз безнең әллә ничек

Ватылган да төсле, бөтен дә.

Онытмамын, укытучым,

Бәхетле бул!- диеп әйткәнең.

Яшь аралаш кабатлыймын

Хуш мәктәбем,  хуш мәктәбем!

Бүген укучыларыбыз Арчада "Асфальтта рәсем ясау" конкурсында катнаштылар. 5 нче класс  укучысы Бикбаева Адилә "Юл йөрү кагыйдәләрен бел һәм сакла" номинациясендә 3 урынны, 7 нче класс укучысы Минһаҗева Зилә Бөек Җиңүнең 70 еллыгына багышланган рәсем ясау номинациясендә 2 урынны алды. Шулай ук әлеге конкурста 4 нче класс укучысы Гайнуллина Зилә "Парклар һәм скверлар елы" номинациясендә катнашты. Укучыларыбызны җиңүләре белән котлыйбыз!

20 нче май көнне мәктәп стадионында мини футбол буенча районкүләм финал ярышлары үтте. 1 нче урынны Носы мәктәбе командасы, 2 нче урынны Иске Ашыт мәктәбе, 3 нче урынны Сеҗе мәктәбе командасы алды.

Бүген мәктәп стадионында зона буенча мини футбол ярышы үткәрелде. Биредә Урта Курса, Сикертән, Сеҗе, Курса разъезды, Кәче мәктәпләре командалары көч сынашты. Нәтиҗәләр түбәндәгечә булды: 1 урында - Сеҗе, 2 урында  - Урта Курса, 3 урында - Кәче, 4 урында - Курса разъезды, 5 урында - Сикертән командалары. Иртәгә җиңүче командалар ярышачак. Уңышлар аларга!

     Ученица 7 класса Мингазова Зиля приняла участие в конкурсе научно-исследовательских и творческих работ "Нобелевские надежды КНИТУ - 2015". Представила научную работу  (номинация «Дизайн», руководитель-учитель технологии Султанова И.А.), получила сертификат.

Бүген 9 нчы класс укучылары Үрнәктәге Арча агросәнәгать көллиятендә "Ачык ишекләр көне" ндә катнаштылар. Көллияткә кабул итү, уку шартлары, алырга мөмкин булган белгечлекләр буенча күп мәгълүмат тупладылар.  Шулай ук уку бүлмәләрендә, тулай торакта булдылар.    

13 нче май көнне Арча шәһәре стадионында җиңел атлетика буенча ярышлар булып узды. Безнең мәктәп командасы бу ярышта 2 нче урынны яулады. Шәхси беренчелектә дә призлы урыннар бар. Алар: Сәләхова Фәнүзә - 400 м га йөгерүдә 2 нче урын, Мөхәммәдиев Илмир - 3000 м га йөгерүдә 3 нче урын. Барлык катнашкан укучыларны җиңүләре белән котлыйбыз!

Мәктәп бакчасында көннән-көн кызу эш кайный. Укытучылар коллективы һәм укучылар көче белән бакча тәртипкә китерелә. Чәчәклекләрне, яшелчә утырту өчен  җирләрне  укучылар тырышып әзерлиләр. Чәчәк үсентеләре инде күптән әзер. Кәбестә, помидор, борыч үсентеләре авыл халкына сату өчен дә күпләп үстерелә. 

Экологик белем бирү көне уңаеннан мәктәптә "Бердәм экологик дәрес" үтте. Укучыларның экология буенча белемнәре баетылды, табигатькә сакчыл караш турында әңгәмәләр үтте, фильмнар күрсәтелде, плакатлар, рәсемнәр ясалды.

Бүген 9 нчы класс укучылары татар теле фәненнән Бердәм Республика Тестын эшләделәр.