Без, Яңа Кырлай урта мәктәбе коллективы, пенсионер укытучылар, 20 июнь көнне   бабаларыбыз яшәгән төбәккә, көчле һәм мәгърур Болгар музей-тыюлыгына экскурсиягә  бардык. Ата-бабаларыбыз яшәгән, өмет белән саҗдә кылган яклар бу. Рухыбыз үткәннәр белән тоташты. Халкыбыз, динебез һәм телебез турында уйландык. Чал ташлар, хәрабәләрдән торгызылган мәһабәт корылмалар… Әйе, соңгы елларда борынгы Болгар жире яңарыш кичерә. Күп хатирәләрне үзләренә сеңдереп яткан хәрабәләр, халкыбызның үлмәс рухына булган һәйкәлләргә әверелеп яңарып, матураеп торып бастылар. Болгар музей-тыюлыгында кабат торгызылган Ак мәчет, Көньяк мавзолей, Төньяк мавзолей, Кече манара, Ак пулат, Кара пулат, Хан мунчасы, Хан төрбәсе, Кече шәһәрчек, Габдрахман коесы, Рәбига күле янында йөрдек һәм халык хәтерендә сакланган риваятьләрне  тыңладык, фоталарга төштек. Гомер уза, еллар үтә. Тарих тәгәрмәче алга тәгәри. Кешелек ашыга-ашыга киләчәккә атлый. Тик бер генә мизгелгә артка карыйк та, халкыбыз нинди дәвер, чор аша үткәнен уйлыйк. “Үткәнен белмәгән халыкның киләчәге юк” – диләр. Дөрес сүзләр. Халык хәтере булып яңарыш кичергән Изге Болгар җире һәркайсыбызга да бик якын, газиз шул. Сәяхәтебездән алган онытмаслык тәэсирләребезне һәм рәхмәт хисләрен сүзләр белән генә белдереп бетерерлек түгел. Күңелдәге чиксез горурлык хисе белән сәяхәтебезне тәмамладык.

Бүген лагерьның 19 нчы көне. Безнең көнебез иртәдән бик куңелле башланып китте. Бездә бүген экология көне булды.  Иртәнге зарядкадан һәм тәмле ашлардан соң саф һавада төрле-төрле хәрәкәтле уеннар уйнадык. Ә инде төшке аштан соң мәктәп каршындагы чәчәклекләрне чүптән арындырдык.  Су буйларындагы чүпләрне җыйдык. Көнебез бик файдалы булды.

Бүген Ия елгасы буенча көймәдә сәяхәт иттек. Г. Тукай исемендәге мемориаль музей хезмәткәре Солтанов Абдулла абыйга бик зур рәхмәт. Сәяхәт бик күңелле булды.

Лагерьның 15 нче көне.  "Изгелек эшлә - игелек күр" дигән темага тәрбия чарасы уткәрелде һәм ветеран укытучы Гатауллин Илгизәр абыйга хуҗалык эшләрендэ ярдәм иттек.  Көнебез бик файдалы утте.

"Сөйкемле Шүрәле" конкурсында җинеп чыккан эшләр күргәзмәсе белән таныштык. Эшләрнең төрлелегенә сокланып, хозурланып йөрдек.

Яңа Кырлай урта мәктәбе каршында оешкан “Дуслык” мәктәп яны җәйге ял лагерында 12 июнь - Россия көне уңаеннан тәрбия сәгате,викторина,рәсем конкурсы үткәрелде, китаплар күргәзмәсе оештырылды. Бәйрәм иртәсе София Ротару башкаруындагы “Родина моя” җыры астында иртәнге зарядка белән башланып китте. Россия көненә багышланган “Дәүләтебез символлары” дигән темага тәрбия сәгате уздырылды. Бу тәрбия сәгате балаларның дәүләтебез символикасы турында булган белемнәрен ныгытты. Соңыннан балаларның белемнәрен тикшерү максатыннан, викторина уздырылды, Россияне ничек күзалллауларын асфальта рәсем ясап күрсәттеләр. һәм нәтиҗә ясалды. Россия көненә багышланган мероприятиене балалар кулларын йөрәк турысына куеп, дәүләт гимнын җырлап тәмамладылар.

Бүген лагерьда "Театр яктылыкка, нурга илтә " дигән темага бик кызыклы кичә булды. Театрларны, аларны язган язучыларны тануга багышланган сорауларга жаваплар эзләделәр. Кичә ахырында төрле әкиятләрне сәхнәләштереп курсәттеләр.