1.     26 апрель-татар шигърияте күгендә балкып янган иң зур йолдызыбыз - бөек Тукаебыз туган көн. Шул уңайдан мәктәбебездә күп кенә чаралар үткәрелде. Мәктәп сәхнәсендә “ Тукай – безнең күңелләрдә” дигән күргәзмә эшләде. Анда шагыйрь турында күп мәгълүматлар алырга, Тукай музейларына сәяхәт итәргә, укучыларның иллюстрацияләрен күрергә була. Ә атналыкның иң күңелле мизгеле, әлбәттә, Шигырь бәйрәме. Ул көнне бездә “ачык микрофон” эшли. Күңелендә шигырь уты уянган һәркем чыгыш ясый ала. Әлеге чараны Диләрә һәм Айнур (Былтыр) башлап җибәрде. Кичәдә 20 дән артык укучы чыгыш ясады. Бәйрәм “Туган тел” җыры белән тәмамланды. Чарада катнашкан һәр укучы истәлек бүләк алды.

25 апрель көнне ТИН укытучысы Гатиятов Р.Р. Чернобыль фаҗигасен искә алып, презентация ярдәме белән укучыларга чыгыш ясады. Шулай ук "Маяк" һаләкәтен торгызу эшләрендә катнашкан Сәрдә авылында яшәүче Шигабиев Әхтәмҗан абый турында "Игътибарлы бул!" тимурчылар отряды укучылары төшергән видеоязма белән таныштылар.

23 апрель көнне Шекше гомумбелем бирү мәктәбендә эшләп килүче “Кәләпүш” бию төркеме халык биюләре наминациясендә “Татарстан гөле” биюе белән катнашып уңышлы чыгыш ясап кайттылар . Алдагы конкурсларда да актив катнашуларын һәм уңышларга ирешүләрен теләп калабыз .

"Мир без нацизма" конкурсына Ахметшина Зәлия, Сагитова Фәнүзә, Зайнагиева Зәлинәләрнен эшләре район турына тәкъдим ителде. Аларга уңышлар телибез!

1957нче елның 29нчы сентябрендә «Маяк»та зур шартлау була, тирә яктагы төбәкләрне нурланышлы болыт каплый. Барлыгы 270 меңнән артык кешенең сәламәтлегенә зур зыян килә. Соңрак 40лап авыл күчерелә, ниндидер сәбәптән зур татар авыллары утырып кала. Андагы кешеләрнең күбесе инде вафат, исән калганнары төрле авырулардан интегә. Сәрдә авылында яшәүче  Шигабиев Ахтямзян абый шуларның берсе. Мәктәптә эшләп килүче  "Игътибарлы бул" тимурчылар отрядының 3 класс укучылары Шигабиева Рәзинә, Аглиуллина Айсинә Ахтямзан абый янында булдылар. Ул укучылар белән үзенең хәтирәләрен уртаклашты. Укучыларга үзенең җылы теләкләрен җиткерде.

Мәктәбебезнең татар теле һәм әдәбияты укытучысы Зәйнәгыева Зөлфия Фоатовна һәм 4 класс укучысы Фаваризова Рәлинә, 8 класс укучысы Зиннатова Әдиләләр Г.Тукайның туган көне уңаеннан "Саба дулкыннары" радиосында чыгыш ясадылар. Тапшыруны 26 апрель  көнне тыңлый аласыз.

«New generation: новый взгляд» конкурсына 3 нче класс укучысы Исхакова Дания саламнан ясаган "Шүрәле" аппликациясен тәкъдим итте. Без аңа уңышлар телибез.