Бүген  Лесхозга Боз сараена шуарга бардык. Балалар бер сәгать буе рәхәтләнеп шудылар.

Бүген дә балалар шау-гөр килеп лагерьга җыйналдылар. "Мишә" мәктәп яны лагеренда ял итүчеләр өчен табигать бүген дә бик матур җәйге кояшлы көн бүләк итте.Иртәнге аштан соң балалар чишмәләр чистартырга бардылар.Чишмәләрнең  атамаларының килеп чыгышы белән таныштылар.

Авылыбыз балыклы суларга бик бай. Шуны истә тотып, бүген "Балыкчы" көне үткәрергә уйладык. Һәр бала өйләреннән кармаклар алып килделәр. Су буенда иң зур балык тотучыны билгеләдек. Ул Газизуллин Азат. Иң беренче балыкны да Азат тотты. Иң кечкенә балык эләктерүче Ахатов Рәис. Аларга призлар бирелде.

Бүген без бассейнга барачакбыз! Иртәнге зарядканы күңелле итеп ясап алдык та, тәмле боткалар белән сыйландык. Аннан соң хәрәкәтле уеннар уйнап алдык. Бераздан безне әйдаман апаларыбыз "Акыл - тезген, белем - ат, тезгенеңне белеп тарт "дип аталган бәйгегә чакырдылар. Ике отряд арасында төрле сораулар, биремнәрне яудырып кына тордылар. Сораулар төрле өлкәдән иде. Бәйгедә бүген “Салават күпере” отряды җиңүче  булды. Афәрин! Тәмле итеп төшке ашны ашаганнан соң Сабага бассейнга киттек. Андагы рәхәтлекне сүзләр белән генә аңлатып бетерү мөмкин түгел! Бик тә, бик тә күңелле һәм шәп булды!

Иртәнге аштан соң һәр отряд аерым бүлмәләргә таралышты. Бүген бездә "Бантиклар" бәйрәме.Һәр укучы булдыра алганча бантиклир җыеп килгән. Аннары шулар белән үзләрен бизәделәр. Иң күп бантикны Илүзә Галимҗанова җыйган иде. Аңа беренче урын куелды. Икенче урынны Гөлинә Галиева, ә өченче урынны  Айсинә  Яруллиналар яуладылар

Иртәнге аштан соң җыелышып якындагы урманга экскурсиягә киттек.  Башта балалар урмандагы матурлыкка хозурланып йөрделәр, аннары  күп итеп табигый материаллар җыйдылар. Бераз ял итеп алгач, хәрәкәтле уеннар башланды. Балаларга аеруча "Аучы" уены ошады. Урманнан кайткач, үзләре җыйган материаллардан күргәзмә оештырдык.

Бүген балаларның күңелләре бик күтәренке. Чөнки без Казан шәһәренә сәяхәткә барабыз. Иртәнге гимнастикадан соң, иртәнге ашны ашадык та автобусларга утырып юлга кузгалдык. Сәяхәтебез зоопарктан башланды. Балалар бик кызыксынып хайваннарны күзәттеләр.Аеруча бегемот, тигр, еланнар яныннан китмәделәр. Аларга ботаник бакчадагы үсемлекләр дә бик ошады.Казанның истәлекле урыннарына сәяхәт ясадык. Балалар бик канәгать калды.

Бүген бездә “Яшь актерлар” конкурсы.  Балалар иртәдән үк конкурска әзерләнә башладылар. Киемнәр әзерләделәр. Салават күпере отряды “Теремкәй”, “Шалкан” әкиятләрен, ә Кояшкай отряды “Сертотмас үрдәк” әкиятен сәхнәләштерде. Әлеге конкурсның җиңүчеләре - Багутова Миләүшә, Давлетова Язилә, Яруллина Айсинә. Бу укучылар иң яхшы артистлык сәләтенә ия дип табылды.  Спорт мәйданчыгында уйнаган уеннарны да балалар бик ошаттылар. Аеруча “Саннар” уенын балалар яратып уйнады. Физкультурачылар көне унаеннан  мәдәният хезмәткәрләре белән берлектә үткәрелгән спорт ярышлары да балалар күңеленә хуш килде.Балалар рәхәтләнеп йөгерделәр, сикерделәр. Көннең үткәне сизелми дә калды.

6 нчы август -  Хиросима көне. Шул унайдан "Хиросима кабатланмасын" дигән чара үткәрдек һәм кәгазьдән торналар ясадык. "Йолдызлы сәгать" уенын да бик ошаттык. Әлеге бәйгенең сораулары бөек шагыйребез Г. Тукай иҗатына багышланган иде.

Көндәгечә көндәлек режим буенча иртәнге линейка, зарядка һәм аш булды. Бүген без мәдәният йорты хезмәткәрләре белән очраштык һәм аларның эшчәнлеге, авыл мәдәният йортының тарихы  белән таныштык, “Нәүрүз” фольклор ансанбленең чыгышын карадык. Безне авылыбызның үзешчән абый-апаларының чыгышы таң калдырды. Җыр-биюгә, нәфис сүзгә осталыклары белән алар зур артистлардан бер дә ким түгел! Тамаша залында үзеңне тоту кагыйдәләрен исебезгә төшердек. Авыл музее һәм китапханәсендә булдык. Без дә сәхнәдә үзебезнең осталыкларыбызны күрсәттек.  Мәдәният йорты директоры Гәүһәрия апа белән китапханәче Тәгъзимә апага, “Нәүрүз”леләргә зур рәхмәт! Саф һавада футбол, “Самовар”, “Буяулы”, “Йөзек салышлы”, “Сантики-фантики”, “Аю-бүреле”. “Сәгатьле”, “Тартмада ни бар?” уеннарын уйнадык. Күңелебездә бары тик матур тәэсирләр калдырып, лагерның тагы бер көне үтеп тә китте.