11 гыйнвар - иң әдәпле бәйрәмнәрнең берсе - Халыкара "Рәхмәт" көне (International Thank You Day). Үз-үзеңне әдәпле тотарга кирәклеге турында без инде кечкенәдән үк беләбез. Тормышта гына ул "җылы сүзләрнең" мәгънәсе турында уйланып тормыйбыз. Ләкин ул сүзләрнең чын мәгънәсендә сихри көчкә ия булуы күренеп тора - кешеләр ул сүзләр аша бер-берсенә шатлык бүләк итәләр, игътибарлы икәнлекләрен күрсәтәләр һәм күңелләрдә яхшы тойгылар гына уяталар. Ә ул тойгыларсыз яшәү рәвеше дә караңгы һәм ярлы булыр иде.

Рус сүзе - "Спасибо" - "спаси Бог" сүзеннән алынган дип карала. Ә безнең "рәхмәт" сүзе гарәпчәдән килгән һәм "аяу", "кичерү" "мәрхәмәт итү" дип , яисә яхшылыкка җавап итеп әйтелә торган сүз итеп аңлатыла.

Әйдәгез, бу көнне  без дә бер-беребезгә "җылы сүзләр" генә әйтик. Салкын кышкы көннәрдә бер-беребезнең җаннарына җылы өләшик!

Укучыларыбыз дәресләрдән тыш вакытта “Хореография” һәм “Мини футбол” түгәрәкләрендә шөгыльләнәләр.

   Район башлыгы Миңнеханов Рәис Нургали улы катнашында Лесхоз мәдәният йортында үткәрелгән чыршы бәйрәменнән мәктәбебез укучылары зур канәгатьләнү хисләре кичереп кайттылар. Чөнки бәйрәм балалар күңелендә озак сакланырлык итеп оештырылган иде.  Бу искиткеч тамашада бер бала да тик тормады: җырлады, уйнады, биеде, чыршы тирәли әйләнде. Яңа ел сюрпризлары да күп булды. Бу чын мәгънәсендә аралашу, дуслашу бәйрәменә әверелде. Бәйрәм соңында барлык балаларга район башлыгының күчтәнәче һәм уку кирәк – яраклары алырга 400 сумлык сертификатлар тапшырылды. Җитәкчеләребезгә һәм бәйрәмне оештыручыларга олы рәхмәтебезне җиткерәбез.

Бүген мәктәбебездә Бөтенроссия укучылар олимпиадасының республика этабында катнашачак укучылар белән әзерлек эшләре үткәрелде.

Иртәгә, ягъни 7 нче гыйнвар көнне, Лесхоз бистәсе мәдәният йортында Саба муниципаль районы башлыгы Миңнеханов Рәис Нургали улы катнашында Чыршы бәйрәме үткәреләчәк. Бу чарага районыбыз мәктәпләреннән уку алдынгылары, спортта, иҗатта һәм җәмәгать тормышында иң актив булган укучылар чакырылды. Безнең мәктәбебездән бу бәйрәмгә Шәймуллин Ислам, Әхмәтханова Алинә, Гайфетдинова Диана, Галиева Айзилә, Шакирова Айзилә, Әхмиева Илфизә, Сабирҗанова Алия, Әхмиева Гөлфизә, Галиев Рәнис һәм Гыйлметдинова Илсинәләр барачак. Күңелле яллар сезгә, балалар!

Хоккейчы егетләребез мәктәбебез шугалагын әледән – әле кардан арындырып, тәртиптә тоталар. Һәркөн саен шуучы балаларның шат авазлары, шайба тавышлары саф һавада еракларга яңгырый. Бердәм файдалы хезмәт һәркемнең күңеленә шатлык – куанычлар китерә, җанга – тәнгә сәламәтлек өсти.

Каникул көннәрендә 9,11 нче сыйныф укучылары өчен математика, рус теле, татар теле,  биология һәм физика фәннәреннән консультацияләр үткәрелә.