Көз фасылының үзенә генә хас булган матурлыгын һәм гүзәллеген күрә белергә өйрәтү, көз көне бик күп җиләк-җимешләрнең, яшелчәләрнең җитешүен, уңышының җыелуын аңлату, көзге байлыкның халыкка шатлык, куанычлар китерүен төшендерү, ел фасылларына караган бәйрәмнәр һәм йолалар тарихы белән таныштыруны дәвам итү, табигатькә сакчыл караш тәрбияләү максатыннан 6 – 10 октябрь көннәрендә “Көз күчтәнәчләре” атналыгы үткәрелде. Йомгаклау чарасы итеп икенче кечкенәләр төркемендә "Көзге матур бер көндә", уртанчылар төркемендә "Сөмбелә бәйрәме", зурлар, мәктәпкә әзерлек төркеменәрендә рус телендә "Что за чудо огород!"   бәйрәм иртәләре уздырылды. Яшелчә, җиләк-җимешләрдән балалар һәм әти-әниләр тырышлыгында “Көзге могҗиза” исеме аастында күргәзмә оештырылды. 

3 нче октябрь көнне районыбыз педагоглары укытучылар көне уңаеннан оештырылган бәйрәмгә җыйналдылар. Район мәдәният йортында үткән бәйрәм тантанасында безнең тәрбиячебез Абдуллина Наилә Гараевна да бар иде. Аңа Саба районы Башкарма комитеты җитәкчесе  Равиль  Мөбәрәк улы Гасимов  районыбыз башлыгы Рәис Нургали улы Миннеханов исеменнән РӘХМӘТ ХАТЫ тапшырды. Без, Наилә Гараевнаны чын күңелебездән котлыйбыз һәм аңа куаныч-шатлыклар теләп калабыз.

Бүген бакчабызда Корбан бәйрәме уңаеннан олы чара үткәрелде. Балалар, бүген махсус корбан итеннән  әзерләнгән ризыктан авыз итеп, музыка залына җыйналып илебезгә тынычлык, барлык балаларга бәхет, әти-әниләренең исән-сау булуын теләп дога кылдылар. 

Өлкәннәр көне уңаеннан язылган “Шатлык” балалар бакчасы хезмәт ветераннарын чәй табынына чакырды" [+фото] дип исемләнгән мәкаләне "Саба таңнары" үзенең сайтына урнаштырды.. Аны ТАТМЕДИЯ сайтында http://saby-rt.ru/ аша кереп укый аласыз.

Экскурсиядә алган хис-тойгыларны, көзге табигатьтәге үзгәрешләрне, аның матурлыгын балалар рәсемдә чагылдырдылар. Балалар тырышлыгында “Алтын көз” темасы астында рәсем күргәзмәсе оештырылды.

Яңгыр түгел, кар да түгел.

Яфраклар ява җиргә.

Көз турында җырлыймын мин –

Кушыл син яңа җырга.

Сары, сары, сап-сары

Агачның яфраклары.

Җил исә, ява яфрак –

Көзнең матур чаклары.

Ләбиб Лерон

Бүген бакчабызга үз һөнәрләренә озак еллар тугры хезмәт итеп лаеклы ялга чыккан хезмәттәшләребезне 1 октябрь – Өлкәннәр көне уңаеннан бәйрәм чарасына чакырдык . Өлкәннәребезне хөрмәтләп балалар һәм хезмәткәрләр концерт номерлары белән чыгыш ясадылар. Өлкәннәребез яшьлек елларын, хәтирәләрен яңарттылар. Бакчабазның 80 еллык тарихында булган кызыклы вакыйгаларны искә төшерделәр. Яшьләргә үзләренең киңәшләрен биреп, зурдан-зур уңышларга ирешеп эшләвебезне теләп калдылар. Бүләкләр алып, рәхмәтләрен җиткереп, киләсе елга кабат очрашырга язсын,- дип таралыштылар.