Җәйге яллардан соң без кабат "Салават күпере"нә җыендык. Чыннан да, сагынганбыз икән бит. Безгә бирелгән вакытның узганын да сизмәгәнбез. Без түземсезлек белән чираттагы атнаны көтәчәкбез. Рәхмәт сиңа, "Салават күпере".

Яңа уку елы башында балалар куркынычсызлыгын тәэмин итү, укучыларның җәйге каникуллардан соң янгын вакытында, юлда йөргәндә, транспортта, гадәттән тыш хәлләр килеп чыкканда үз-үзләрен тоту күнекмәләрен торгызу максатыннан, гомуми белем бирү учрежденияләрендә балалар куркынычсызлыгы айлыгы уздырыла. Әлеге уңайдан мәктәпләрдә җитәкчеләр, укытучылар составы һәм анда хезмәт күрсәтүче эшче персонал белән инструктажлар, укучылар белән “Куркынычсызлык дәресләре” үткәрелә.

Асоциаль күренешләрне профилактикалау буенча "Салкынча җил - 2016" республика фестиваленең район этабы агитбригадалары чыгышы булды.  Бу фестиваль Татарстан Республикасының  белем оешмалары арасында сәламәтлекне саклау һәм куркынычсыз тормыш рәвешен чагылдырган, үзеңнең һәм әйләнә-тирәдәгеләрнең  сәламәтлегенә уңай мөнәсәбәт тудыруга багышланган укучы балаларның иҗади эшчәнлекләрен күтәрү максатыннан уздырыла. Әлеге уңайдан укучыларыбыз  агитбригада чыгышында катнашып кайтты. 

Халыкара грамоталылык көне кысаларында үткәрелгән "Матур сүз"  көнендә укучыларыбыз   бай эчтәлекле  шигырьләр сөйләделәр. Бүген укучыларыбызның сөйләм культурасына зур игътибар бирелде. Көн дәвамында һәрбер бирелгән сорауга төгәл җавап бирү таләпләре куелды. Бер- беребезгә яхшы мөгамәләдә булыйк!

"Көзге мәрхәмәтлелек атналыгы"на старт бирелде. Бүген укучыларны  атналыкның планы белән тәрбия эшләре буенча директор урынбасары Шәрәфиева Л.Ә. таныштырды. 

Терроризмга каршы көрәштә бердәмлек көне 2004 елның 1-3 сентябрь көннәрендә Беслан шәһәрендә булган фаҗигале хәлләргә бәйле рәвештә оештырыла. Гражданлык һәм патриотизм хисен тәрбияләү максатыннан бүген мәктәпләрдә  “Экстремизмга – юк!” исеме астында махсус дәресләр, бу темага багышланган түгәрәк өстәлләр, лекцияләр узды. Махсус рәвештә уяулыкны тикшереп карау һәм куркынычсызлык кагыйдәләрен тагын бер кат искәртү өчен мәктәптә эвакуация ясалды.

3 нче сентябрьдә терроризмга каршы көрәштә бердәмлек көне уңаеннан Россия Федерациясе халыклары белән бергә без бернинди гаепсезгә гомерләре өзелгән терроризм акты корбаннарын искә алабыз. Укучыларда Ватаныбызның бүгенгесе һәм киләчәге өчен без гражданлык хисләре тәрбияләүне, милләтләр бердәмлеген ныгытуны максат итеп куябыз. Бүген барлык сыйныфларда класс сәгатьләре үткәрелде. 

 Белем бәйрәме һәркем өчен матур, истәлекле көннәрнең берсе. Мәктәп бүген үзенең күптән көтеп алган укучыларын кабул итте. Кемнәрдер алдагы уку елында алган белемнәрен дәвам итәргә, ә кемнәрдер әле беренче хәреф танырга гына аяк баса. Шулай да,  һәркем өчен уку елы матур башлангычлар белән башлансын һәм уку елы ахырына да матур нәтиҗәләр белән барып җитәргә язсын. Яңа уку елы белән, сезне!

Бүген барлык сыйныфларда да "Кайбычыма - 25!" дигән темага беренче дәрес үткәрелде. Һәрбер сыйныф туган төбәгебезнең тарихына күз салды. 

Педагогик киңәшмәдә яңа уку елына максатлар һәм бурычлар куелды. Аларны тормышка ашыруда күп көч сарыф итәргә кирәк. Коллектив үз алдына куелган таләпләрне төгәл үтәгәндә барысы да нәтиҗәле булыр.