Укытучылар көне уңаеннан оештырылган бәйрәм җылы, матур итеп билгеләп үтелде. Укучыларыбызның чыгышлары белән үрелеп барган бәйрәм ничек матур булмасын, ди.  Аларның чыгышларында укытучыларга булган олы хөрмәт, игътибарлылык, уңай мөнәсәбәт чагылыш тапты. Рәхмәт сезгә, укучылар!

Гражданнар оборонасы көне уңаеннан тормыш иминлеге нигезләреннән ачык дәрес үткәрелде. Дәрестә гадәттән тыш хәлләр килеп чыкканда, нинди саклану чаралары кулланырга тиешлеге өйрәнелде. 

Кайбыч муниципаль  районы мәктәпләре бүген зур ярминкәдә катнашты. Җыеп алынган уңышның артыгын сату өчен,  менә дигән мөмкинлек бу. Без дә әлеге ярминкәдән читтә калмадык. 

Без янәдән "Салават күпере"ндә. чөнки һәрбер укучы суда йөзәргә өйрәнергә тиеш. ГТО шуны таләп итә. Безгә атнага 1 тапкыр мәктәп белән, гаилә белән теләгән кадәр бассейнда йөзү мөмкинлеге бар. Йөзү сәламәтлеккә дә файдалы. Иммунитет какшап китсә дә, бассейн иң яхшы дәва. 

Талантлы балаларны ачыклау, белемнәрен тирәнтен тикшерүгә этәргеч биргән фән олимпиадалары дәвам итә. Бүген укучылар җәмгыять белеменнән олимпиада биремнәре эшләделәр.  

Кайбыч районы үзәк сырхауханәсенең участок педиатры Писарева Г.П.  гомумбелем бирү учреждениеләрендә план нигезендә укучыларның сәламәтлекләренә күзәтү үткәрде.  Укучыларның буен, авырлыгын үлчиләр, эчке органнар эшчәнлеген тикшерәләр, үпкә, йөрәкне тыңлыйлар, сәламәтлек төркемен, физик һәм нерв-психик үсешен, физкультура төркемен билгелиләр. Баланың сәламәтлеге какшаган булса, алга таба тикшеренү өчен юллама бирелә. Медицина тикшерүе күрүе начарланган укучыларны ачыкларга да ярдәм итә. 

"Мәктәпләрдә наркоманияне профилактикалау"  интернет - дәресе үткәрелде. Укучылар түбәндәге интернет адрес буенча күрсәтелгән видеоязманы карады (http://ctreamer.bstu/confzal/). Һәр чорда да наркотикларга каршы көрәш алып барылган, куллануны тыю турында карарлар кабул ителгән.Киләчәктә үзебезне зарарлы гадәтләр колына әйләндермик, тормышыбызның хуҗасы булып, чын кешеләр булып яшик!

Шимбә көнне мәктәптә елдагыча көзге кросс - "Милләтләр кроссы" узды. Барлык укучылар һәм укытучылар катнашында узган йөгерештә һәркем беренче килергә тырышты. «Милләтләр кроссы»нда катнашу күпләр өчен үзмаксат түгел, ә спорт сыйфатларын, физик көчне күрсәтү, җиңүгә омтылу, гади итеп әйткәндә, күтәренке кәеф алу мөмкинлеге. Көттереп кенә искән җылы җилле, матур көндә сәламәт яшәү рәвеше алып баручылар белән аралашу гына ни тора! Чараның ахырында мәктәбебезнең пешекчеләре барлык катнашучыларны кайнар чәй һәм тәмле коймак белән сыйлады.

“Балага куркынычсыз мохит тудыруда ата – аналарның җаваплылыгы” темасына  гомуми ата - аналар җыелышы үткәрелде. Авылыбызның фельдшеры Сибгатова Фәридә "Грипп һәм ОРЗның килеп чыгу сәбәпләре" темасына чыгыш ясады. Мәктәп җитәкчесе Зиганшин А.Р.  яңа уку елына ата - аналар белән эшнең максаты һәм бурычлары белән таныштырды. Үзара хезмәттәшлек иткәндә генә уңай нәтиҗәләргә ирешергә мөмкин булуына басым ясады.