Бүген мәктәптә 4 класс укучыларын Татарстан Варислар Берлегенә кабул итү тантанасы булды. Алар варис булырга күптән әзерләнделәр: варисларның законнарын, девизын, шигырен өйрәнделәр. Бәйрәм яшерелгән галстукларны эзләү белән башланып китте. Укучылар мәктәп территориясендәге агачлар арасыннан, төрле сорауларга җавап биреп, галстукларны табу бәхетенә ирештеләр. Бәйрәм актлар залында дәвам итте. Безгә кунакка Убырлы да килде. Ул һәр класска сынаулар әзерләгән, соңыннан ул балаларга серле күчтәнәчләр биреп китте. Дүртенчеләргә галстукларны, кайчандыр пионерлар сафында булган, укытучы апалары бәйләде.

Инде менә берничә көн мәктәбебез укучылары авылыбызны яшелләндерү өстендә эшлиләр. 11 май көнне 7 класс укучылары 600 төп нарат, 12 май көнне 10 класс укучылары 755 төп нарат утырттылар. Шулай итеп авылыбыз тирәсенә барлыгы 1355 төп агач утыртылды.

Инде менә берничә көн рәттән мәктәп бакчасында эш гөрли. Һәр класс үзләренә беркетелгән җирләргә чәчәк утырта. Берничә класс кишер, чөгендер утырту белән мәшгуль. Калган класслар тырышып суган утырталар. Укучылар бик тырышып эшлиләр. Җыеласы уңыш үзебез өчен бит. Яшелчәдән ясалган салат, винегретларны барыбыз да яратабыз шул.

Калганнар бакчада эшләсә, 9, 11 класс укучылары барлык көчләрен куеп киләсе имтиханнарга эзерләнәләр. Алардан атнага берничә мәртәбә математика һәм рус теленнән пробный ЕГЭ алалар. Уңышлар юлдаш булсын сезгә!

        Бүген авылда Бөек Җиңүнең 66 еллыгына багышланган митинг уздырылды. Митингта барлык укучылар, укытучылар, авыл халкы, сугыш һәм тыл ветераннары катнашты. Тантана авыл уртасында урнашкан һәйкәл янында узды. Митингта авыл җитәкчеләре, тыл ветераны Хасанов Фәрит абый, район вәкиле Зәкиев Вакыйф Мансурович, бүгенге көндә авылыбыз тарихын язу өстендә эшләүче хөрмәтле кешебез Мәгъсәм Абдулловичлар чыгыш ясады. Тантананың иң матур өлеше 3 класс укучылары чыгышы булды. Алар "Бөек Җиңүгә 66 ел" дип исемләнгән музыкаль монтаж куйдылар. Соңыннан һәйкәлгә укучылар көче белән ясалган веноклар салынды.
      Митингтан соң сугыш һәм тыл ветераннары клубка әзерләнгән чәй табынына чакырылды. Аларга мәктәп укучылары көче белән концерт куелды.

Мәктәптә бәйрәмгә әзерлек эшләре күптән бара. Укучыларыбыз һәйкәл тирәсен чистарту өмәсендә катнаштылар. Һәйкәлгә салу өчен чәчәкләр ясалды, веноклар әзерләнде. Һәр класс үзенә беркетелгән ветеранга котлау открыткалары илтте, ветераннарның хәлләрен белде,7 май көнне булачак бәйрәм тантанасына чакырды.