21 март – урман көненә багышлап, 1-6 сыйныфлар өчен,  “Урман –безнең байлыгыбыз” дип исемләнгән чара үтте. Укучылар урман темасына багышланган сорауларга җавап бирделәр, кызыклы биремнәр үтәделәр. Соңыннан сыерчык оялары конкурсы булды.

Борбаш авылында , РСФСР ның спорт мастеры Фидәил Шакиров истәлегенә багышлап уздырылган милли көрәштә,  безнең егетләр командасы 2 нче урынны яулады.

Район күләмендә физкультура укытучыларына  ГТО нормалары тапшыру,  аның таләпләрен  аңлату буенча уку оештырылды. Әлеге укуда мәктәбебезнең физкультура укытучысы Мухаметгалиев Ранил Накипович катнашты.

Бүген, 1-6 сыйныф укучылары өчен, тыл ветераннары һәм сугыш чоры балаларына  багышланган чара үткәрелде. “Җиңү килде җирне нурга төреп” исеме астында уздырылган бу чарада укучылар сугыш михнәтләрен үз җилкәсендә татыган, Җиңү таңын якынайтуда үзләреннән зур өлеш керткән әби-бабайларны искә алдылар. Кичә күмәк башкаруда  “Матур булсын” дигән җыр белән тәмамланды.

Бүген 4 сыйныфтан- Сәләхетдинова Эльвира һәм 7 нче сыйныфтан Шафигуллин Искәндәр Арча районының 7 нче номерлы мәктәбендә үткән “Илһам” бөтенроссия яшь язучылар бәйгесенең  зона этабында катнаштылар. Алар анда “Яшь шагыйрь” номинациясе буенча уңышлы чыгыш ясап, Казанга - бәйгене йомгаклау бәйрәменә чакыру алдылар.

Җиңүнең 70 еллыгына багышлап чаралар үткәрү дәвам итә. Чираттагысы- авылыбыздагы бердәнбер исән сугыш ветераны Разыя апага багышлап үткәрелде.

3 сыйныфта Бөек Ватан Сугышына багышланган музей турында “Сугыш истәлекләре” дип аталган тәрбия сәгате узды.

“Язның игелекле атнасы” кысаларында “Шәфкатьлелек ярминкәсе” үткәрдек. Укучылар ярминкәгә бик тырышып әзерләнгәннәр иде: сатучылар да, сатып алучылар да канәгать калды. Ярминкәдән кергән акча авыру балаларга ярдәмгә китәчәк.

Бөек Җиңүнең 70 еллыгы уңаеннан Советлар Союзы Герое Габдулла Гарифуллинны искә алу кичәсе узды. Укучылар аның тормыш юлын һәм сугышта күрсәткән батырлыкларын искә төшерделәр, аңа багышлап язылган җырны тыңладылар.

Мәктәптә, “Язның игелекле атнасы” уңаеннан , таушалган китаплар төпләнде.