10 нчы февраль көнне очрашу кичәсе булып үтте. Әлеге очрашуга Бөрбаш урта мәктәбен 45, 40, 35, 30, 25, 20, 15 ел элек тәмамлаган шәхесләр чакырылды. Очрашу бәйрәме искиткеч күңелле һәм матур үтте. Килгән кунакларның барысы олы рәхмәтләрен белдереп, укыткан укытучыларына, мәктәпкә бүләкләр тапшырдылар. Һәр класс үзләренчә искә алды мәктәп елларын. Классташлары белән, укытучылар белән булган кызыклы, истәлекле мизгелләрен хәтерләренә төшерделәр. Очрашудан һәркем якты , матур хатирәләр белән таралды.

Районыбызда уздырылган Форпост ярышларында укучыларыбыз уңышлы гына чыгыш ясап кайттылар. Д.Муратов, Д.Хаҗиева, А.Гариповалар дипломнар белән бүләкләнделәр.

11 нче февраль көнне Вафин Динияр, Газизуллин Кәрим, Шәрипова Фәйрүзә ТНВ каналында күрсәтелә торган “Тамчы шоу” тапшыруында катнаштылар. Алар Мамадыш районы Түбән Ушма мәктәбенең “Хыял” командасы белән көч сынаштылар. Укучыларыбыз үзләренең татар рәссамнарының иҗаты, күренекле шәхесләр һәм уку фәннәре буенча үзләренең белемнәрен сынап карадылар. Нәтиҗәдә мәктәбебезнең “Әбугалисина” командасы җиңүгә иреште. Афәрин, укучылар! Алга таба да шундый белемле, тапкыр, җитез булып калуыгызны теләп калабыз.

10 нчы февраль көнне мәктәбебездә Бөтенрәсәй “Чаңгы юлы- 2018” узды. Биредә һәммә укучы һәм укытучы бик теләп катнашты. Афәрин!

2 нче февраль көнне Хайруллина Венера Надил кызы “Ел сыйныф җитәкчесе-2018” бәйгесенен муниципаль этабында унышлы чыгыш ясады. Венера Надиловнага уңышлар теләп калабыз.

3 нче февраль көнне 2-4 нче сыйныф укучылары өчен “Күңелле стартлар” ярышы булды. Укучылар үзләренең бик җитез икәнлекләрен күрсәттеләр. Нәтиҗәдә дуслык җиңде.

29-31нче гыйнварда Казан шәһәрендә татар мәктәпләрендә укучылар өчен татар теленнән республика олимпиадаларының йомгаклау туры үткәрелде. Бөрбаш урта мәктәбенең 11 нче сыйныфы укучысы Латыпова Алсу (укытучысы Нуретдинова З.З.) республика олимпиадасының призеры дипломына ия булды.

Алсуны зур җиңүе белән котлыйбыз, укуында уңышлар телибез!

2 нче февраль көнне 1-6 нчы сыйныф укучылары катнашында инглиз телендә шигырь сөйләү һәм әкият күрсәтү бәйгесе узды. Укучылар “Шалкан”, “Кызыл калфак” әкиятләрендә бик теләп катнаштылар. Инглиз телендә сөйләшү осталыкларын күрсәттеләр.

2 нче февраль көнне Динә Мәүлет кызы 3 нче сыйныфта әйләнә- тирә дөнья фәненнән ачык дәрес күрсәтте. Укучылар “Файдалы казылмалар” темасы буенча проект эше эшләделәр. Дәрес бик җанлы, укучылар өчен мавыктыргыч булды.

31 нче гыйнвар көнне укытучыбыз Гөлнара Сафуановна укучылар өчен инглиз теленнән КВН уздырды. Биредә 6- 9 нчы сыйныфлардан егетләр һәм кызлар командасы ярышты. Кичәдә укучыларыбызның инглиз телен никадәр яхшы белгәнлекләрен күрергә булды. Уен җиңү һәм җиңелүләрсез булмый. Озак кына көч сынашканнан соң егетләр командасы алга чыкты. Афәрин, егетләр һәм кызлар!