Бүген 4 нче класс укучылары һәм аларның әниләре катнашында бәйрәм чарасы үтте. Укучылар, якыннарын котлап, шигырьләр сөйләделәр, җырлар, биюләр башкардылар. Әниләр дә төрле кызыклы уеннарда катнашып, күңелләрен күтәрделәр. Үз балаларының кулларыннан ясалган бүләкләрне алу зур шатлык булды.Бәйрәмне Мөхәмәдиева Н.З.оештырды.

Арча шәһәре стадионында чаңгы сезонын ябу уңаеннан марафон булып узган иде. Безнең чаңгычылар бу юлы да сынатмады, мәктәп командасы әлеге ярышта 2 нче урынны яулады. Шәхси беренчелектә дә уңышлар бар. Алар - Галимуллина Илүзә (9 кл.) - 2 урын, Минһаҗева Зилә (8 кл.) - 3 урын, Яруллин Дәниф (5 кл.) - 3 урын. Спортчыларга алга таба да җиңүләр телибез!

Кадерле хатын-кызларыбыз! Сезне язның иң беренче, иң күңелле бәйрәме – Халыкара хатын-кызлар көне – 8 Март белән ихлас күңелебездән тәбрик итәбез! Язгы кояш нурлары һәм сезнең ягымлы елмаюыгыз белән яктыртылган бу көн сезгә бары тик сәламәтлек, бәхет китерсен. Тормышыгыз шатлык белән тулсын, туган һәр яңа көнне елмаеп, зур өметләр белән каршы алыгыз! Күңелегез саф, хисләрегез эчкерсез, хыялларыгыз якты һәм матур булсын.

Авыл яшьләре командалары арасында уздырылучы волейбол ярышы инде традициягә әйләнде дисәк тә була. Бәйрәм уңаеннан алар кабат спортзалга җыелды. 9 команда арасында барган көрәш кичкә кадәр дәвам итте. Командалар составында мәктәп укучылары да катнашты. Нәтиҗәләр түбәндәгечә: 1 урында Арча шәһәренең КСМ командасы, 2 урында - Алан яшьләре командасы,  3 урында -- Ю.Курса авыл яшьләре командасы.

8 март бәйрәме алдыннан 1 нче класс укучыларының әниләре мәктәпкә килде. Алар кыз һәм улларының уку, язу, сөйләм осталыгын күзәтте. Укучылар әниләренә күп һөнәрләрен дә күрсәттеләр. Соңыннан әниләр белән бергәләп алар төрле уеннарда, конкурсларда катнаштылар. 

Бүген мәктәптә хезмәт һәм сәнгать атналыгы кысаларында “Караоке батл” бәйгесе булып узды. Бәйгедә катнашучылар тамашачыларны матур җырлары, сорауларга күңелле итеп җавап бирүләре, үзләренең тапкырлыклары һәм зирәклекләре белән сөендерделәр, хит җырларны караокега кушылып башкардылар. Бәйгене тамашачылар да бик җылы кабул итте.

27 нче февраль көнне Яңа Кенәр мәктәбендә 2001-2002 нче елгы кызлар командалары арасында Галиуллин Ришат Әсгат улы истәлегенә волейбол ярышы уздырылган иде. Мәктәбебезнең кызлар командасы әлеге уенда актив катнашты һәм 4 нче урынны яулады. Тренерлары - Гарифуллин Г.В. Афәрин, кызлар! Алдагы уеннарда сезгә зур җиңүләр насыйп булсын!

25 нче февраль көнне Арча укучылар сараенда Әтнә, Балтач, Арча районнары укучылары арасында региональ шахмат ярышы булып узды. Бу ярышта безнең мәктәп укучылары да катнашты. Шәхси беренчелектә 3 нче класс укучысы Шәфигуллин Камиль һәм 7 нче класс укучысы Солтанова Камилә икесе дә призлы 3 нче урынны алды. 6 нчы класс укучысы Хәмзин Ришат та уңышлы чыгыш ясады. (тренерлары - Лотфуллин М.Л.) Укучыларны әлеге җиңүләре белән котлыйбыз, алга таба да уңышлар телибез.