Бүген 3 нче чирек нәтиҗәләре буенча педсовет узды. Мәктәптә укучыларның өлгереше, имтиханнарга әзерлек буенча укыту эшләре буенча директор урынбасары Вәлиева Н.Т.ның,"УУГ ны формалаштырганда системалы-эшчәнлекле якын килү технологияләрен куллану" темасына Юнысова Р.К.ның чыгышы тыңланды, класс җитәкчеләренең һәм тәрбия эшләре буенча директор урынбасары Садриева Н.З.ның тәрбия эше буенча алып барылган эшчәнлекләренә анализ ясалды, IV чиреккә бурычлар куелды.

Габдулла Тукайның туган көне уңаеннан районда, мәктәптә уздырылган чараларда мәктәбебез укучылары да актив катнаша. Бүген чираттагы бәйрәм Урта Курса авылында үтте.  Биредә Г.Тукай исемендәге урам булганлыктан, җирле үзидарә, авыл мәдәният йорты, мәктәп, китапханә белән берлектә зур бәйрәм чарасы урамда уздырылды. Матур итеп бизәлгән сәхнәдә Тукай әкиятләрендәге геройларны - Шүрәлене, Су анасын, җигүле атта килгән Былтырны, "Кәҗә белән Сарык" әкиятендәге геройларны, бишек җырын көйләп сабыен йоклатучы ананы, Акбай белән Шәкертне, тырышып сабагын өйрәнүче Малайны һ.б. күрергә мөмкин иде. Кичәдә өлкәннәр һәм укучылар Г.Тукайның шигырьләрен сөйләделәр, аның сүзләренә язылган җырларны башкардылар. Шүрәле килгән кунакларның күңелен ачты, көлдерде, төрле уеннар уйнатты. Ахырдан бар да тәмле ботка, кайнар чәй һәм тәм-томнар белән сыйланды. 

Бүген 9 нчы сыйныф укучылары татар теле буенча сынау тестында катнаштылар һәм барлык биремнәрне дә уңышлы башкарып чыктылар.

Сөекле шагыйребез Г.Тукайның 130 еллыгы уңаеннан барлык классларда да шагыйрьнең әсәрләре белән танышу дәвам итә. 1 нче класс укучылары бүген каникулда өйрәнеп, ятлап килгән шигырьләрен сөйләделәр һәм шагыйрь әсәрләре буенча мультфильмнар карадылар.

Бүген «Арча» спорткомплексында 2001-2002 нче елгы һәм аннан да яшьрәк малайлар һәм кызлар арасында волейбол турниры узды. Анда район мәктәпләре командалары белән беррәтән Биектау, Әтнә, Теләче командалары да катнашты. Мәктәбебезнең кызлар командасы әлеге ярышта бик күп көндәшләрен артта калдырды һәм Яңа Кенәр, Әтнә, Теләче командаларыннан азга гына калышып, 4 нче урынны яулады, җиңүчеләр булды. Команда составында Мингазова Зилә, Садриева Альбина, Мөхәмәдиева Алия, Мингазова Илүзә, Солтанова Камилә, Хөснетдинова Инзилә, Галимуллина Илүзә уйнады. Афәрин, кызлар!

Каникул вакытында да волейбол секциясенә йөрүче кызлар спортзалга тренировкаларга йөриләр, ярышка әзерләнәләр.

 9 нчы класс укучылары бүген сайлап алынган биология фәненнән имтиханга әзерләнделәр, биремнәр эшләделәр.

19 нчы март көнне Шушмабаш урта мәктәбе базасында Г.Тукайның 130 еллыгына багышланган ООО СХП "Северный" җитәкчесе кубогына милли көрәш ярышы булды. Мәктәбебез көрәшчеләре әлеге ярышларда да сынатмады: Сәләхов Илнар (8 кл.), Мөхәрләмов Айдар (7 кл.), Нурисламов Рәниф (7 кл.) өчесе дә үз үлчәү авырлыгында 3 нче урынга лаек булды. (тренерлары - Әхмәдиев М.Г.) Афәрин, егетләр! Җиңүегез белән котлыйбыз!