Күп укыган – күп белә. Китап дөньяны танып белергә өйрәтә. Бүген  Сарай-Чокырча башлангыч мәктәбендә “Китапханә дәресе” үтте. Авыл китапханәсе мөдире Гайнуллина А. бүген укучыларга бик күп китаплар алып килде. Укучыларга дәрес бик ошады. Әсәрләр аша  без матурлыкны күрә белергә, туган телебезне, халкыбызны яратырга, намуслы, шәфкатьле булырга өйрәнәбез.

6 ноябрь – Татарстан Җөмһүриятенең Конституциясе көне. Моннан 22 ел элек, 1992 нче елның 6нчы ноябрендә, Татарстанның Дәүләт Шурасы республикабызның төп канунын кабул иткән иде. 6 нчы ноябрь – милләтебез өчен олы һәм һаман да әле мөһимлеген югалтмаган көн буларак билгеләп үтелә. Барлык милләттәшләребезне әлеге истәлекле көн белән котлыйбыз!

Каникул көннәрендә Арча укучылар сараенда район беренчелегенә шахмат ярышы булып үтте. Мәктәбебез укучылары да (Яруллин Рәниф, Хәмзин Ришат) әлеге ярышта актив катнашты, команда призлы 3 нче урынны яулады. Шәхси беренчелектә 8-10 нчы класслар арасында Хәмзин Ришат шулай ук 3 нче урынга лаек булды. Катнашкан укучыларны һәм аларның тренерлары Лотфуллин М.Л. җиңүләре белән котлыйбыз!

Мәктәптә "Көзге бал" кичәсе үтте.  Укучылар тырыш хезмәт нәтиҗәсе булып үскән яшелчәләрдән  көзге композиция, концерт номерлары әзерләделәр. Барлык класслар  да әлеге чараны үткәрүдә актив катнашты. Укучылар башкаруында күңелле, кызык һәм җитди шигырьләр, җырлар бәйрәмне тагын да ямьләделәр..

Бүген мәктәп территориясендә көзге өмә үтте. 5-7 нче сыйныф укучылары мәктәп янын агач яфракларыннан, чүпләрдән чистартты, чәчәк түтәлләрен казыды.

Бүген укучылар белән очрашуга районның балигъ булмаганнар белән эшләүче инспекторы Диярова Р.Г. килде. Ул укучыларга җәмәгать урыннарында үз-үзеңне тоту кагыйдәләре, зарарлы гадәтләрнең зыяны, аларны кисәтү чаралары турында сөйләде, законнар белән таныштырды. Очрашу укучылар өчен бик файдалы булды.