24-29 апрель көннәре мәктәбебездә Туган тел атналыгы дип игълан ителде. 24 апрель көнне 9 класс укучылары татар теленнән районда БРТ тапшырдылар. 25 апрель көнне 1-11 класс укучылары катнашында шигырь бәйгесе үтте.

22 апрель көнне авылыбызның мәдәният йортында  урнашкан китапханәдә Мигъраҗ кичәсе үткәрелде.  Мәктәбебездән 5-6 класс кызлары да чакырулы иделәр. Авылыбыз китапханәчесе Сибгатуллина Энҗе Фасил кызы оештырды аны. Авылыбызның ак апасы, остазбикә Әфүзә апа бу көн турында тирән эчтәлекле вәгазь сөйләде. Коръән укырга өйрәнгән 8 апабызга Шәһадәтнамәләр дә тапшырылды. Роза апа Шәйхелмәрдәнова моңлы тавышы белән мөнәҗәтләр укыды. Укучыларыбыз шигырьләр сөйләделәр. Кичә тирән эчтәлекле һәм тәрбияви төстә үтте.

22 апрель җирлегебездә Өмә көне дип игълан ителде. 2 дәрес укыганнан соң мәктәп укучылары тирә-юньннәрне җыештырырга, чүптән арындырырга өмәгә чыктылар.

20 апрель көнне "Гомернең кадерен белик!" дип исемләнгән  ачык класс сәгате үтте. Анда авылыбыз фельдшеры  Фатыйхова Люция апа чакырылган иде. Ул укучыларга сәламәтлекнең кадерен белү, аны саклау, язгы чорда баш калкытучы йогышлы авырулар турында хәбәр итте.

21 апрель көнне мәктәбебезнең югары класс укучылары җирле узидарә рәисе Гафуров Айваз Әбсогет улы белән очрашу үткәрделәр. Җирлекнең, мәктәбебезнең киләчәге, аның проблемалары хакында сүз барды. Укучылар кызыксынган сорауларына да җаваплар тапты.  

17-22 апрель көннәре районыбызда "Язгы мәрхәмәтлелек аталыгы" дип игълан ителде. Шул уңайдан мәктәбебез укучылары билгеләнгән ялгыз әби-бабайларга, авылыбыз уртасында торган һәйкәлгә  шефлык оештырдылар.  

19 апрель көнне "Госуслуг порталы-безнең дус һәм ярдәмче" исеме астында укучылар тарафыннан өлкәннәребезгә аңлату эшләре алып барылды.

18 апрель көнне башлангыч класс укучылары  үзебезнең мәктәбебездә урнашкан Туган якны өйрәнү музеенда булдылар.

17 апрель көнне мәктәптә гомуми ата-аналар җыелышы үтте. Көн тәртибе буенча җыелышка районның полиция бүлеге бәлигъ булмаганнар белән эшләү инспекциясенең өлкән инспекторы полиция майоры Ахунова Ания Анил кызы,  авылыбыз фельдшеры Фатыйхова Люция апа чакырылганнар иде. Җыелыш ике өлештән торды. Беренче өлештә  районыбызның эчке тәртибе, кич чыгулар, җинаятьләр турында Ания Анил кызы, язгы чорда баш калкытучы авырулар турында Фатыйхова Люция апа, тукланудагы үзгәрешләр турында мәктәп директоры Вәлиева Гөлназ Сәгыйтҗан кызы чыгыш белән катнаштылар. 2 нче өлештә "Ел укучысы" бәйгесе үтте. "Ел укучысы" исеменә 2 класс укучысы Хәмидуллин Фаяз ия булды.

Районда үткәрелгән "Гади авиамодельләр" конкурсында мәктәбебез укучылары да катнашты һәм сертификатка ия булдылар.