18 ноябрь көнне районда көрәш ярышы  булды. Физкультура укытучысы Булат Робертович җитәкчелегендә мәктәптән 9 укучы катнашты һәм уңышлы гына чыгыш ясады.

14-19 ноябрь көннәре мәктәптә математика атналыгы дип игълан ителде. Атналыкны ачканнан соң 5-11 класслар арасында викторина үткәрелде, 4-9 класс укучылары математика фәне буенча Бөтенроссия олимпиадасында катнашты (2 тур), 9-11 класс укучылары күренекле математиклар тормышыннан кызыклы вакыйгалар белән таныштылар, "Иң көчле математик" конкурсы, 5-8 класслар өчен КВН оештырылды. Укучылар бу атналыкта эзләнделәр, фикерләделәр, чиштеләр, белемнәрен тагын да тирәнәйттеләр,  алар укытучылары Имамова РузиләХаҗип кызы  һәм Вәлиев Рәхимҗан абыйларына бик рәхмәтле. 

БДИ, БРТ белән беррәттән укучыларның  район олимпиадаларына катнашу вакытлары да  килеп җитте. Мәктәптә дәресләрдән соң - кичке якта олимпиадаларга, БДИ, БРТ әзерлек бара.   

Мәктәптә Әниләр көненә әзерлек эшләре бара. 9 класс укучылары "Әниләрнең бөеклеген яши-яши аңлыйбыз" мәктәп газетасын чыгаруга материаллар туплыйлар, "Әтиләр советы" белән  мәктәп егетләре , әниләр һәм кызларга бәйрәм  кичәсе әзерләргә җыеналар. 

Бу атнада дирекция тарафыннан сәнгать мәктәбенең эш тәҗрибәсе өйрәнелде.

Сәнгать мәктәбенең баян классына 6  укучы йөри, вокал- 2 , вокаль ансамблена- 12   , солфеджиода-  8 укучы белем ала. Җитәкчесе- Заһитова Илсөя Индус кызы. Хәзерге вакытта укучылар Ләбиб Лерон иҗаты буенча җырлар өйрәнәләр.

  Бию классының чыгарылыш төркемендә - 7 укучы, 2 төркемдә - 7укучы шөгыльләнә. Җитәкчесе- Идрисова Роза Фәрит кызы. Хәзерге вакытта 30 ноябрь көнне үтәчәк бию конкурсына әзерлек бара.

Рәсем классының 1 төркемендә 3 укучы, 2 нче төркемендә 7 укучы шөгыльләнә. Җитәкчесе - Латыйпов Филүс. Укучылар Әниләр көненә багышлап иҗади эш әзерлиләр.

Ноябрь ае безнең мәктәбебез өчен бигрәк тә куанычлы һәм җаваплы ай булып тора. Чөнки якташыбыз Ләбиб абый Леронның 55 еллык юбилее. Шул уңайдан мәктәптә әзерлек эшләре бара. Укучылар иҗатын тагын да тирәнтен өйрәнәләр, әсәрләрен укыйлар, шигырьләрен ятлыйлар. 

Шул уңайдан  мәктәпнең тәрбия эшләре буенча директор урынбасары Н.М.Җиһангирова Ләбиб Леронның туганнары Асия апа һәм Рөстәм абый Шәйхразиевларда булып кайтты. Шагыйрьнең балачак, үсмер, яшьлек вакыты  чорларын искә төшерделәр, фотоларын барладылар.

Каникулда районда, мәктәптә 9, 11 класс укучыларының кызу эш өсте вакыты булды. Укучылар  рус теле, математика фәннәреннән алдан биреп карау имтиханын тапшырдылар. Мәктәптә укытучылар тарафыннан сайлап алу имтиханнарына да консультацияләр оештырыла. 

"Шома бас" район бәйгесе авылыбызда 1 ноябрь көнне үткәрелде. Ул көнне  балалар бакчасы балаларыннан башлап, өлкәннәргә кадәр биеде. Бәйгегә  жюри комиссиясе тарафыннан югары бәя бирелде.

Менә 1 нче чирек тә тәмамланыр алдында.  Классларга уку, тәрбия, төрле конкурсларда катнашулары, спорт ярышлары, хезмәт буенча урыннар чыгарыла.Укучылар бу атнада контроль эшләр, олимпиадалар эшлиләр, билге тупланышы белән кызыксыналар. 4, 6,8 класс укучылары татар теле буенча район тарафыннан үткәрелгән тест эшләделәр. 9,11 класс укучылары БДИга  әзерләнәләр.

Укучыларның дирекция тарафыннан көндәлекләре каралды, газета-журналларга язылулары барланды.

Ә сәнгать өлкәсендә 1 ноябрьдә районда үткәреләчәк "Шома бас"бәйгесенә әзерлек бара.

Йомгаклап шуны әйтәсе килә: мәктәптә белемгә, тәрбиягә нигезләнгән эш кайный.

Спорт бәйрәме ике көн дәвам итте.Беренче көнне укытучылар һәм укучы кызлар арасында баскетбол ярышы үтте. Команда капитаннары тарафыннан флаг күтәртелде, РТ гимны тыңланды."Шәкертләр" һәм "Мөгаллимнәр" командалары көч сынашты. Ярыш 43 кә 21 очко белән тәмамланды.

Икенче көнне укытучылар һәм укучы егетләр арасында волейбол ярышы үткәрелде. Укучыларның 6 кешедән торган командасы 44 кә 42 очко җыеп җиңү яулады. Бәйрәмне карарга килгән укытучылар һәм җанатар укучылар укытучылар һәм укучылар командаларына көч биреп тордылар. кул чаптылар. Ярыш төгәлләнгәч, мәктәпнең тәрбия эшләре буенча директор урынбасары Н.М.Җиһангирова катнашучыларга грамота һәм истәлекле бүләкләр тапшырды.