Укучыларның көзге каникуллары башланды. Каникул чорында мәктәптә эш тынып тормый. Спорт, иҗат түгәрәкләре эшли. 9, 11, 4 сыйныф укучылары өчен фәннәрдән консультацияләр үткәрелә.  Укучылар ялларын файдалы һәм күңелле итеп уздыралар.

1 ноябрь - мәктәптә «Халыклар бердәмлеге көне» итеп билгеләп үтелде. Бу көнне класс сәгатьләрендә 1-3 класс укучылары дуслыкка кагылышлы шигырь, җырлар башкардылар, рәсемнәр конкурсы үткәрделәр, 4 класс укучылары «Татарлар икенче ополчение эшчәнлегендә» дигән темага, 5 класс укучылары «Дуслык-бердәмлек» темасына,  6-7 класс укучылары  «Тарих битләренә сәяхәт» темасына әңгәмәләр үткәрделәр.    8-9 класс укучылары  сочиненииеләр конкурсы, 10-11 класс укучылары сраулар һәм җаваплар кичәсе үткәрде.  

25 октябрь көнне мәктәбебездә "Алтын Көз" бәйрәме гөрләп узды. Җыр, бию һәм сәхнә осталыгы, рәсем  номинацияләре буенча җиңү яулаган класслар мактау грамотасы белән бүләкләнде.

24 октябрь көнне 10-11 класс укучылары районнан килгән вәкилләр белән очрашты. Районның ФОРПОСТ яшьләр үзәге директоры Хузин Ленар Юсупович һәм Теләче районы имам - хатыйбы Исмәгыйль хәзрәт Фәләхиев укучыларга терроризм һәм экстремизмга каршы профилактик көрәш чаралары турында сөйләделәр. Ленар Юсупович начар гадәтләр белән кызыксынмыйчы спортка тартылырга тәкъдим итте, мисалга безнең мәктәп укучысы Зәйнетдинов Ришатны китерде. Имам-хатыйб чын мөселман кешесенең беркайчан да начар эшләр башкармавы турында искәртте. Соңыннан укучылар белән анкета-сораштыру үткәрелде.

16 сентябрьдән 16 октябрьгә кадәр республикакүләм наркотикларга каршы көрәш айлыгы булып узды. Бу айлыкта  Иске Җөри урта мәктәбе дә актив катнашты. Айлык кысаларында укучылар өчен төрле тәрбия, спорт  чаралары үткәрелде.  Фельдшер тарафыннан "Сак бул!" дигән темага лекция укылды. Әти-әниләр өчен "Путь к успеху" программасы буенча тренинглар, түгәрәк өстәл, әңгәмәләр үткәрелде. Педагоглар киңәшмәләрдә, класс җитәкчеләре семинарларында укучыларны ничек бу куркыныч адымнан саклау турында видеофильмнар, презентацияләр карадылар. 

Иске Җөри урта мәктәбенең тәҗрибәчелек участогында  да җәй буе  эш тынып тормады. Укучылар бакчада мул итеп яшелчә, җиләк-җимеш үстерделәр. Бер генә укучы да бу файдалы һәм мавыктыргыч эштән читтә калмады. Инде уңышны җыяр вакыт та җитте. 27 октябрь көнне, дәресләрдән соң, барлык укучылар бердәм рәвештә мәктәп бакчасына чыгып, җәен үстергән үңышны җыйдылар. Уңышның бер өлеше ашханәдә кулланыр өчен, кышкы саклауга,  икенче өлеше ярминкәдә сатыр өчен әзерләп куелды

12 октябрь көнне Теләчедә авыл хуҗалыгы хезмәтчәннәре көненә багышланган ярминкә булып узды. Ярминкәдә безнең Иске Җөри урта мәктәбеннән дә яшелчә, җиләк –җимеш, укучылар һәм укытучыларның кул эшләре алып барып сатылды.   Мәктәп ашханәсе хезмәткәрләре ярминкәгә килүчеләрне кайнар коймак, баллы чәй белән сыйладылар 

10 октябрь көнне Теләченең «Батыр» спорт комплексында кул көрәше буенча район беренчелеге булып узды. Бу бәйгедә  безнең мәктәптән дә укучылар катнашты һәм барлыгы  8 призлы урын алдылар. 9 класс укучысы  Хасанов Кәримне район чемпионы булуы белән тәбрик итәбез. Бәйгедә катнашкан барлык укучыларыбызга рәхмәт белдерәбез, укуларында һәм спортта зур уңышлар телибез. 

1 октябрь көнне мәктәптә өлкәннәр көне уңаеннан,  ветераннар белән очрашу оештырылды. Очрашуга авылның хезмәт ветераннары жыелган иде. Ветераннарыбыз укучыларга үзләренең һөнәрләре. хезмәт юлары турында сөйләделәр. Бәйрәм укучыларның күчтәнәч концерты һәм чәй эчү белән тәмамланды.

Дүшәмбедән  мәктәптә агач утырту атналыгы игълан ителде.  Мәктәп янын яшелләндерү эшендә барлык класс укучылары  да актив катнаша. Тиздән мәктәптә һәр классның укучылар аллеясе гөрләп үсәчәк.