Лагерьның һәр көне план нигезендә үтә. Иртәнге аштан соң , укучылар экология темасына мультфильмнар карадылар, пионербол ярышында иң көчле командаларны ачыкладылар.

Мәктәбебездә мәктәп яны лагере белән беррәттән хезмәт һәм ял лагере да гөрли. Хезмәт һәм ял лагерена 8 нче сыйныфтан 10 укучы йөри. Бакчада эшләгәннән соң, төрле чараларда, спорт уеннарында теләп катнашалар.

Челтер- челтер чишмә ага

Һич тә тыймалы түгел.

Ә сулары шундый йомшак

Эчеп туймалы түгел.

Без барабыз чишмәбезнең

Салкын суын эчәргә.

Эчкәндә үзеннән-үзе

Баш иелә чишмәгә.

Менә шундый матур шигырь язган чишмәләр турында яраткан шагыйребез Р. Миңнуллин.

Бүгенге көн лагерьга йөрүчеләрнең хәтерләрендә авылыбыз чишмәләренә сәяхәт белән истә калыр, мөгаен.

Бүген лагерьда ял итүчеләр Югары Симет фельдшер-акушерлык пунктына медосмотр үтәргә бардылар. Саф һавада спорт уеннары уйнадылар. Төшке аштан соң лагерьны ачу тантанасы булды.

Бүген 1-5  нче сыйныфлардан 20 укучы өчен мәктәп яны лагере ,  8 нче сыйныфтан 10 укучы өчен ял һәм хезмәт  лагере үз ишекләрен ачтылар. Укучылар лагерь кагыйдәләре белән таныштылар, отряд газеталары ясадылар. 1 июнь - Балаларны яклау көне уңаеннан үткәрелгән "Һәрвакыт булсын кояш!" рәсем бәйгесендә актив катнаштылар.

Балаларны яклау көне уңаеннан бүген мәктәп Сабантуе үткәрелде. Тантаналы линейкадан соң, укучылар милли уеннар белән беррәттән, спорт ярышларында да катнаштылар һәм истәлекле бүләкләргә ия булдылар. Җәйге каникулларда исән-имин ял итеп, яңа уку елына яңа көч-дәрт белән килергә насыйп булсын!!!

Кадерле 11 нче сыйныф укучылары!

Сезне бәйрәмегез белән котлыйбыз! Киләчәктә биек үрләр яулавыгызны, имтиханнарыгызны уңышлы тапшыруыгызны, сау-сәламәт булуыгызны телибез.

 Кайчан гына әле күбәләктәй

Ашкынып килдегез мәктәпкә

Җиз кыңгырау дәште сезне һәркөн

Яңалыклар тулы дәрескә.

 Үтте бик күп айлар, үтте еллар.

Күз алдында үсеп җиттегез.

Белем үрләренә омтылдыгыз

Бәйгеләрдә бик еш җиңдегез.

 Мәктәптә сез канат ныгыттыгыз,

Хәзер инде очып китәсез.

Шатлык, куаныч,изге күңел белән

Каршылагыз һәр көн иртәсен.

Ак юллар Сезгә!

Узып китте 4 ел уку елы, 

Ямансу да, бүген, читен дә.

Шатлыгыбыз безнең әллә ничек,

Ватылган да төсле, бөтен дә.

Синдә күрергә өйрәндем

Матурлыгын дөньяның.

Тәүге кат синдә башкардым,

Балачагым җырларын, - дип саубуллаштылар беренче укытучылары Гарифуллина Дилә Гамилевна белән 4 нче сыйныф укучылары Инсаф, Илфар, Диана, Сөмбел, Ләйсән.

Кадерле 4 нче сыйныф укучылары!

Белем үрләренең башлангыч баскычын уңышлы тәмамлавыгыз белән котлыйбыз. Урта сыйныфлар рәтенә баскач та, үзегезнең ныклы белемегезне күрсәтеп, иң актив укучылар булып калуыгызны телибез.