Бүген Югары Симет мәдәният йортында математика укытучысы Нуриева А.М.ның юбилее уңаеннан портрет-кичә үткәрелде.

9 нчы сыйныф укучысы Загриев Фоат ТР укучылары арасында үткәрелгән су модельләре спорты беренчелегендә  III призлы урынга ия булды. Фоатны һәм "Судомоделирование" түгәрәге җитәкчесе Имамиев Ильмир Ильфатовичны зур җиңүләре белән котлыйбыз, киләчәктә дә җиңүләр телибез. 

1 нче сентябрьдән мәктәбебездә "Экстремизмга - Юк!" айлыгы башланды. Әлеге айлык кысаларында Югары Симет авыл җирлеге участок вәкаләтлесе Гатин Марат Мурсалимович мәктәп администрациясе һәм хезмәткәрләр белән профилактик чаралар үткәрде, "Терроризмга каршы көрәш" темасына әңгәмә үткәрде.

Хөрмәтле Азалия Мәгсумовна!

Сезне олы бәйрәмгез — 55 яшьлек юбилеегыз белән чын күңелдән котлыйбыз. Сезгә нык сәламәтлек, күңел тынычлыгы, гаилә шатлыгы, кайгы-хәсрәтсез көннәр, ак бәхетләр, балаларыгызның күңел җылысын тоеп, игелекләрен күреп, бәхетле озын гомер кичерүегезне телибез. Киләчәгегез җыр кебек матур, кояш кебек якты булсын. Туачак таңнарың һәрвакыт нурлы, күк йөзең һәрвакыт аяз булсын. Гел шулай елмаеп, кешеләрне сөендереп яшәгез!

Тормыш юлың һәрчак балкып торсын,
Ягымлы, шат булсын күңелең.
Озын гомер, бәхет-шатлык белән
Бер кайгысыз үтсен гомерең.
Зур бәхетләр юлдаш булсын сиңа,
Көннәреңне шатлык бизәсен.
Сәламәтлек — ярты бәхет, диләр,
Шушы бәхет читләп үтмәсен.

Чакыра, тагын чакыра

Кыңгырау классларга .

Бүгеннән – Белем көненнән

Уку елын башларга.

Бүгеннән 2016-2017 нче уку елын башлап җибәрдек. 1 нче сыйныфка укырга 6 укучы - 2 кыз һәм 4 малай килделәр. Барлык укучыларга һәм укытучыларга Яңа уку елында иҗади уңышлар, саулык-сәламәтлек юлдаш булса иде. Хәерле сәгатьтә!!! 

Хөрмәтле Рәзифә Кыямовна!

Олы юбилеегыз белән чын күңелдән котлыйбыз! Алдагы көннәрдә саулык, озын гомер, гаилә тигезлеге, балаларыгызның игелеген күреп яшәвегезне телибез.

Куанырга сәбәп бар ул үзе-

Җиттең менә ике “биш”легә.

Күпләргә әле 55 яшьлек гомер-

Буй җитмәслек биек үр генә.

Үзең генә белгәнсеңдер инде

Таңнарыңның ничек атканын.

Сизәсеңме, бәйрәм булып,

Бәхетеңнең бүген кайтканын?

Яшьлек матурлыгы берни түгел,

Акыл матурлыгы йөзеңдә.

Бүгенгедәй бәхет көтсен сине,

Гомереңнең алтын көзендә.

Юлларыңда киртә очраса да,

Тирән упкыннарга юлыкма.

Һәрчак сиңа ярдәмгә килерлек

Якыннарың барын онытма!

Җәйне барыбыз да зарыгып көтеп ала. Аеруча балалар ярата аны. Өч ай буе иректә булу, үзең теләгәнне эшләү нинди зур бәхет бит. Урамда йөрисеңме, су керәсеңме –барысы да үз иркеңдә. Шушы рәхәтлекләр белән бергә, җәй – хәвеф-хәтәрләргә дә бай чор ул.Көннәр аеруча кызу торган вакытта су буйлары, урам һәркемне үзенә дәшә. Әз генә саксызлык күрсәтү дә гомерлек үкенеч белән тәмамланырга мөмкин. Җәйге чорда балаларның тормыш иминлеген саклау – һәр ата-ананың иң зур бурычларыннан берсе.Шул уңайдан мәктәптә әти - әниләр җыелышы үткәрелде. Сулыкларда куркынычсызлык кагыйдәләре аңлатылды, куллар куйдырылды. 

Бүген мәктәбебезнең 11 нче сыйныфын тәмамлаган 11 егет һәм кыз кулларына урта белем турында аттестат алдылар. Көндез районда үткәрелгән Чыгарылыш кичәсендә Муллаянов Илнар һәм Садикова Зилә мәгариф бүлеге Грамотасы белән, Файзрахманова Фәридә РФ медале белән бүләкләнделәр. Укучыларның барысын да зур җиңүләре белән котлыйбыз. Үзләре теләгән уку йортларына кереп, исән-имин укуларын телибез.  

Бүген - укучыларның лагерь белән саубуллашу көннәре. Иртәнге аштан соң мәдәният йортында Саубуллашу концерты куйдылар. Төшке аштан соң дискотека үткәрелде.

Укучыларның җәйге каникулларны исән-имин генә үткәреп, яңа көч-дәрт җыеп,  яңадан укырга җыелуларын көтеп калабыз.