25 нче май көнне барлык гомумбелем бирү йортларында чыгарылыш сыйныф укучылары өчен соңгы кыңгырау чыңлаячак. Безнең мәктәбебездә бу тантаналы кичә 9.00 сәгатьтә башлана. Бәйрәмгә рәхим итегез!

   Уку елы тәмамлана..." Чебешләрне көзен саныйлар”, дисәләр дә, мәгариф системасында эшкә нәтиҗәне яз көне ясыйлар. 2015-2016 нчы уку елын йомгакларга да санаулы гына көннәр калып бара.1,9,11 нче сыйныф укучылары өчен 25 нче май - соңгы уку көне, ә 2-8, 10 нчы сыйныфлар 31 нче майда уку елына нокта куячаклар. Бу көннәрдә мәктәбебез укучылары һәм укытучылары өчен кызу эш бара. 9,11 нче сыйныфлар  ДЙА һәм БДИ га әзерләнәләр. Калган укучылар күчеш контроль эшләре эшлиләр, зачетлар тапшыралар. Бакчада орлык чәчү, җир әзерләү, җыештыру һ.б. эшләр башкарыла. 

   Бүген 7 нче сыйныф укучылары Шәрәфиева Мәрьям апага тимурчылыкка бардылар. Алар аңа йорт эшләрендә булыштылар. 

   Чәчәкләр безнең тормышыбызны бизи, кәефне күтәрә. Шунлыктан, иртә яздан ук мәктәбебездә чәчәк үсентеләре үстерелә башлый. Хәзерге вакытта бакчада чәчәклекләр ясау эше бара. Ә үсентеләр, чәчәклекләргә утыртканны көтәләр...

      19 нчы май – һәр кеше күңеленә Пионерия туган көн  булып кереп калгандыр.  1922 елдан башлап, ул тарихта беренче пионер оешмалары барлыкка килгән көн буларак яши... Кемдер үзенең балачагын муенындагы кызыл галстугы белән хәтерли, ә кемгәдер пионер быргысы чакыруы бөтенләй таныш түгел. Кайчандыр шаулап - гөрләп яшәгән Пионерия инде тарихта гына калды. Әмма яшь буын да бер  урында таптанып тормый. Татарстан укучыларының күпчелеге үзләрен варислар дип атый, кемдер эзтабарлар отрядына йөри, кемдер табигать дуслары исемлегенә кергән. Кыскасы, һәр бала ниндидер эш белән шөгыльләнергә, тормышын кызыклырак итәргә тырыша: эзләнә, таба, куллана. 18 нче  май көнне Арташ авылының гүзәл урман аланында, Пионерия туган көненә багышланган слет узды. Бирегә районыбызның 22 балалар оешмасыннан иң актив, сәләтле, иҗади эзтабар һәм варислары, педагог - оештыручылар җыйналды. Слетта балалар  оешмаларының еллык эшчәнлегенә йомгак ясалып, ел дәвамында  иҗади конкурсларда җиңү яулаган, актив катнашкан укучыларга Грамоталар тапшырылды. Укучылар өчен күңелле спорт уеннары оештырылды. 

    18 нче май көнне район мәдәният йортында фән олимпиадаларында район һәм республика күләмендә призлы урын алган укучыларны һәм "Ел укытучысы - 2016" конкурсы җиңүчеләрен тәбрикләү тантанасы үтте. Тантанага шулай ук укучыларның әти – әниләре һәм олимпиадаларга әзерләгән укытучылары чакырылган иде. Безнең мәктәптән бу тантанада татар теле фәненнән республика күләмендә призлы урын яулаган 11 нче сыйныф укучысы Зәйнагиева Зәлинә, “Ел укытучысы - 2016” конкурсы җиңүчеләре - Гафиятова Гөлүсә Айрат кызы, Файзыханова Айсылу Ильяс кызы, Халиков Рамил Рафис улы катнашты. Җиңүчеләрне чын күңелебездән җиңүләре белән котлыйбыз һәм алга таба да зур уңышлар телибез. Без сезнең белән горурланабыз!  

    1998 елдан бирле үткәрелүче бу бәйрәм, Петербург шәһәренә барып тоташа. 1905 елның 19 маенда анда беренче Гомумроссия татар газетасы “Нур”ның тәүге саны басылып чыккан. Татарстан журналистларының һәм газета-журналлар нәшер итү белән бәйле барлык һөнәр ияләренең профессиональ бәйрәме әнә шул дата хөрмәтенә билгеләп үтелә.