Үсеп килүче буынның сәламәтлеген ныгыту, сәламәт яшәү рәвешен формалаштыру,әти-әниләр һәм балаларның аралашуы өчен шартлар тудыру,спорт төрләре белән кызыксынучанлыкларын арттыру максатыннан "Әти, әни һәм мин - спорт сөюче гаилә" исеме астында бик күркәм чара үткәрелде. "Шатлык" балалар бакчасы данын Энҗе, Сафира, Ильнар Файзутдиновлар, Фәридә, Камил, Илшат Вильдановлар гаиләләре яклап катнаштылар. һәрбер гаилә үзләре турында стенгазета әзерләп алып килде. Файзутдиновлар, Вильдановлар гаиләләре төрле спорт, интеллектуаль ярышларда актив катнаштылар. Вильдановлар гаиләсе "Иң көчле гаилә", Файзутдиновлар гаиләсе "Иң җитез гаилә" номинацияләрендә җиңү яулап истәлекле бүләкләргә лаек булдылар. Бакчабызның данын яклап катнашкан Файзутдиновлар, Вильдановлар гаиләләренә зур рәхмәтебезне җиткерәбез. Киләчәктә аларга тыныч-тигез тормыш, саулык-сәламәтлек, озын гомер, бәхет, шатлык, куанычлар, балаларының игелеген күреп яшәүләрен теләп калабыз.

Беренче яуган кар балаларны гына түгел, өлкәннәрне дә сөендерә. Карның әз булуына карамастан балалар берсеннән-берсе уздырып кар бабай әвәләделәр. Җепшек, сыланучан кардан гына әвәләп булуына төшенделәр.

Балаларга җир йөзендә яшәүче халыкларның торак йортлары, аларның яшәү урыннарына бәйле булуын, һәрбер торак йортта бер гаилә яшәвен аңлату, гаилә әгъзаларына хөрмәт, ихтирамлы мөнәсәбәт, ярату хисләре тәрбияләү. Әниләрнең иң якын, кадерле кешеләр булуына төшендерү, әниләргә карата ихтирам, хөрмәт, мәхәббәт, кайгыртучанлык хисләре тәрбияләү, игътибарлылыкларын үстреү. Балаларның йорт җиһазлары турында белемнәрен баету, тирәнәйтү, мөстәкыйль һәм гомүмиләштереп фикерләү сәләтен үстерү максатыннан "Минем гаиләм, өем, йорт җиһазлары. Әниләр көне" атналыгы үткәрелде. Балаларның бердәм эшчәнлегендә атналык тема киң чагылды. Уртанчылар төркемендә "Иң кадерле, иң сөйкемле син ул - Әнием", "Өч аюда кунакта", зурлар төркемендә "Дәү әнием", мәктәпкә әзерлек төркемендә "Минем гаиләм" темаларына багышланды. Балалар тырышлыгында Әниләргә берсеннән-берсе матур бүләкләр әзерләнде.

Әниләр бәйрәме уңаеннан оештырылган "Бердәм гаилә" рәсем күргәзмәсендә һәр гаилә иҗади якын килеп катнашты. Рәсемнәр "Безнең гаилә", "Спорт сөюче гаилә", "Музыкаль гаилә", "Хезмәт сөюче гаилә", "Күңелле ял итәбез" темалары астында кабул ителеп әти-әниләр, балалар хозурлыгына куелды.

"Шатлык" балалар бакчасы коллективы башкалабыз Казанның тарихи истәлекле урыннарына экскурсия оештырып Кол Шәриф мәчете, музейлар да булып Казанның, Татарстанның тарихы белән танышып рухи байлык тупладылар. Галиәскәр Камал театрында "Бабайлар чуагы" комедиясен карап чын мәгънәсендә ял иттеләр.

Балаларда кеше арасында, табын артында үз-үзеңне тоту кагыйдәләрен ныгыту, аралаша белү күнекмәләрен арттыру, кунакчыл булырга, кунакларга хөрмәт күрсәтергә өйрәтү, үзеңне әдәпле тоту, бер-береңә игътибарлылык, ярдәмләшү, дуслык хисләре тәрбияләү атна дәвамында балаларның бердәм эшчәнлеге, эшчәнлектән тыш вакытларда әңгәмәләр, уеннар, матур әдәбият белән таныштыру аша алып барылды. Йомгаклау чарасы итеп зурлар төркеме балалары тәрбияче Сафиуллина Әлфия Камил кызы тырышлыгында "Куянда кунакта" педагогик ситуация сәхнәләштерелде. Кунакка килгән урман җәнлекләре үзләренең үрнәгендә тәртипле, итәгатьле, әдәпле булу кагыйдәләре белән иптәшләрен таныштырдылар.