Бакчабызда балаларга юл йөрү кагыйдәләрен өйрәтү ел әйләнәсендә һәр төркемдә алып барыла. Төзелгән план нигезендә балаларны транспорт төрләре, юлларның траспорт һәм җәяүлеләр йөри торган өлешләре, светофор, юл билгеләре белән таныштыру, светофор төсләренең мәгънәләрен аңлату, юл йөрү кагыйдәләрен төгәл үтәп өйрергә кирәклеген төшендерү,юларда хәрәкәт ритмының тизлеге арта бару шартларында балаларны үз куркынычсызлыкларын, үз-үзләрен сакларга өйрәтү, урамда, җәмәгать транспротында, торак зоналарда үз-үзеңне тоту культурасын тәрбияләү өстендә даими эш алып барыла. Балаларның бердәм эшчәнлек вакытында алган белемнәре дидактик, хәрәкәтле, үстерешле уеннар ярдәмендә ныгытыла, бәйрәм, кичәләрдә кабатлана. "Юл йөрү кагыйдәләре кирәк безгә һәр көнне!" йомгаклау чарасында балалар "Яшь инспектор" түгәрәге җитәкчесе Наилә Гараевна әзерләгән викторинада биремнәрне төгәл үтәп үзләштергән белемнәрен күрсәттеләр. Уен-ярышлар барышында балаларның уйлап фикер йөртүләре, игътибарлы, өлгер, җитез булулары күренде.

Мәктәпкә әзерлек төркеменнән Гайнуллин Динислам "Светофор" уенында "Яшь инспектор" ролен башкарып уртанчылар төркеме балаларының игътибарлы булып уенның кагыйдәләрен төгәл үзләштерүләренә иреште.

Һава торышы белгәндәй көннәр бик матур килде бу атнада. Атна дәвамында балалар рәхәтләнеп кышкы уеннар уйнадылар: чана ярышлары, карлар атышу,  кар бабай әвәләү, кебек уеннар һәм төрле эстафеталар оештырылды.

Балалар уеннарда һәрберсе актив катнашы. Физкультура шөгыльләрен алып баручы Аубакирова Гөлназ тәрбиячеләр белән берлектә балаларның яшләрен, мөмкинлекләрен истә тотып уеннарны төрләндереп уйнаттылар.

Тәрбиячеләребез һәр  эшчәнлекне мавыктыргыч, балаларга кызыклы булсын дип үткәрергә тырыша. Даими рәвештә төрле яңа алымнар кулланып, заманча технологияләр кулланып эшләргә омтыла алар. Мәктәпкәчә тәрбия методикасы хәзер уен һәм иҗади алымнар ысулларын алга куя. Шуны истә тотып, мәктәпкә әзерлек төркеме балалары бу атнада конструкцияләү шөгылендә "Әкият өе" исеме астында кәгазләрдән бөкләп әкияти өй ясадылар, аны матур итеп бизәделәр. Шулай ук әлеге төркем  балалары кисеп ябыштыру шөгылендә кәгазьләрдә кул чукларын төшереп, перчаткалар ясадылар, аларны үзенчәлекле итеп бизәделәр.

       Шушы матур кышкы көндә балалар бакчасында 30 елга якын пешекче булып эшләгән Насибуллина Сания Габделбәр кызы үзенең олы юбилеен - 55 тулган көнен билгеләп үтә. Гомерен аш-су әзерләүгә, кешеләргә тәмле ризыклар белән сыйлауга  багышлаган Сания Габделбәр кызының гомуми эш сташы 38 елдан артып китә. Кайда гына булмасын аның тәмле ризыкларына сокланып туелмый. Бар тырышлыгын куеп, фидакәр хезмәт итүе күпләргә үрнәк булырдай сокланырлык. Бакчабыз пешекчеләре белән әзерләгән ризыклар иң таләпчән кешеләргә-нәниләребез өстәленә куела һәм бик яратылып ашала. Сабыйлар  ашаган саен, бик теләп, пешекче апаларына рәхмәтләрен әйтәләр.

Хөрмәтле Сания Габделбаровна! Сезне, чын күңелебездән олы юбилеегыз белән котлыйбыз! Сезгә ныклы сәламәтлек, куаныч - шатлыклар, бәхетле киләчәк телибез.

55 яшь, матур гомер дисең,

Борчылма син килгән картлыкка.

Исәнлекне күбрәк бирсен Ходай,

Калган гомерең үтсен шатлыкта.