Тылсымга,могҗизага бай Яңа ел бәйрәменә санаулы көннәр калды .Бездә балалар белән Яңа ел бәйрәме турында күзаллауларын баетып бүген чыршы бизәдек.Алар белән уенчыкларның төсләрен кабатлап,зурлыкларын чагыштырып алдык.

Ел саен, ноябрьнең соңгы якшәмбесендә, Әниләр көне билгеләп үтелә.Бу бәйрәмнән без дә читтә калмадык.Шул уңайдан бүген кадерле әниләргә матур бәйрәм кичәсе оештырылды. Бәйрәм  балалар тарафыннан башкарылган шигырьләр, җыр-биюләр белән үрелеп барды. Бәйрәм ахырында балалар әниләренә үз куллары белән ясалган тәбрикләү открыткалары тапшырдылар. Бәйрәмнән балалар да,әти-әниләр дә бик канәгать калдылар. Алда тагын очрашулар, күңелле мизгелләр күп булсын иде дигән теләктә калабыз.

   Көзнең соңгы ае. Тиздән кышка да аяк басабыз.  Барысы да ак юрган астында калачак. 

Күңел көтә яңа елның

Ак мамыктай карларын,

Ап-ак шәлле агачларын

Эх зәхәр бураннарын.

    Барлык балалар да Кыш Бабайга хат язарга ярата.  Менә без дә   балалар белән Кыш Бабайга хат яздык  әле. Бүләк сорап түгел. Ни өчен икәнен беләсегез киләме? Килсә тыңлагыз. Тиздән 18 ноябрьдә – Кыш Бабайның туган көне. Һәркемнең дә туган көне булган кебек, Кыш бабайның да туган көне бар икән, ләбаса.  18 ноябрь – Кыш Бабайның туган көне. Нигә нәкъ менә бу көндә дисезме?! Чөнки суыклар менә шушы көннән башлана икән. Туган ягы Бөек Устюг. Һәркем бүләк көткән шикелле ул да туган көненә бүләк көтә.

6 ноябрьдә Татарстан Республикасында Конституция көне - аның территориясендә яшәүче халыкларның иң төп законы билгеләп үтелә.

Балалар бакчасында Татарстан Конституциясе көне-үзенчәлекле вакыйга.

 Балалар Дәүләт символлары - герб, флаг, гимн һәм аларны булдыру тарихы белән таныштылар. Чараның максаты:

• балаларда Конституциянең һәм Дәүләт символларының мәгънәсен аңлау;
• ватанпәрвәрлек хисе тәрбияләү;
• тәрбияләнүчеләрнең гомуми мәдәниятен үстерү һәм белем дәрәҗәсен арттыру.

Балалар күпмилләтле республикабыз буйлап интерактив сәяхәт кылдылар, Татарстан башкаласы Казан турында күп кенә кызык яңалыклар белделәр, Татарстанның төрле шәһәрләренең истәлекле урыннары һәм мәдәният һәйкәлләре белән таныштылар.

" 4 ноябрь - Бердәмлек көне" уңаеннан балалар белән пластинография техникасы кулланып флаг эшләдек.

Бүген Татарстан Республикасы Әтнә муниципаль районы «Шиһабетдин Мәрҗани исемендәге Комыргуҗа урта гомуми белем бирү мәктәбе» муниципаль бюджет гомуми белем бирү учреждениесе базасында тәрбиячеләр өчен «Мәктәпкәчә яшьтәге балаларның сөйләм үсеше буенча шөгелләрне ФББП таләпләрен исәпкә алып оештыру» темасына район семинары узды. 

20 октябрь -Халыкара пешекчеләр көне. Безнең балалар бакчасында балаларыбызны тәмле ризыклар пешереп ашатучы Раилә апайны да hөнәри бәйрәме повар -пешекчеләр көне белән котлыйбыз. Җаваплы эштә уңышлар, ныклы сәламәтлек, гаилә бәхете телибез.

19 октябрьдә Россиядә Әтиләр көнен  билгеләп үтү уңаеннан Таш - Чишмә балалар бакчасында элеге бәйрәмгә багышланган чара үткәрдек. Балалар белән  әтиләренә открыткалар ясадык, кызыклы тематик әңгәмә үткәрдек. Балалар әтиләренә карата игелекле hәм назлы сүзләрне искә төшерделәр,әтиләр турында табышмакларны чиштек. Бәйрәм белән хөрмәтле әтиләребез.