Бүген - 1 сентябрь. Барлык укучыларны, укытучыларны, әти-әниләрне шушы бәйрәм белән чын күңелебездән котлыйбыз. Бу уку елы бары шатлык-куанычлар, югары күрсәткечләр алып килсен иде. Тынычлык белән уку елы ахырына һәрберебезгә дә барып җитәргә насыйп булсын. 

 28 август көнне район һәм шәһәр укытучылары Яшел Үзәнгә чираттагы август киңәшмәсенә җыйналды. Былгысы Музыкаль театр бинасы һәм аның каршындагы мәйданда узды. Гадәттәгечә безнең мәктәп анда авыл хуҗалыгы продукциясе күргәзмәсе белән катнашты. Җәй буе үстерелгән яшелчә һәм җиләк-җимеш килгән кунаклар һәм катнашучылар хозурына куелды. Киңәшмәгә килгән Мәгариф министры Э.Фәттахов та безнең күргәзмә яныннан тиз генә узып китә алмады, безнең эшчәнлек белән кызыксынды, сорауларын бирде һәм алга таба да уңышлар теләде. Соңыннан алып килгән продукция шәһәр халкына тәкъдим ителде, сатылды.

   Быел мәктәп бусагасын атлап беренче сыйныфка 7 укучы киләчәк. Җомга көнне Танай мәктәбендә "Мәктәпкә әзерләнергә булыш!" акциясе кысаларында беренче сыныф укучыларына портфельләр тапшырдылар. Әлеге чарада 45 бала катнашты, шул исәптән безнең 7 укучыбыз да. Чара тантаналы төстә узды, Танай мәктәбе коллективы күңелле генә программа әзерләгән иде. Сорау-уеннар урысча булса да укучылар актив булдылар. Әлеге укучыларга әзерләгән бүләкләр өчен ата-аналар Хәйруллин фондына зур рәхмәтен җиткерә!

   Мәктәп коллективы җәйге ялдан эшкә чыкты. Киләсе атнада мәктәпләрне яңа уку елына әзерлеген тикшерүче комиссия килгәнче мәктәпнең эчке һәм тышкы территориясен чистартып, әзерләп, кабинетларны карап куясы бар. Шунлыктан мәктәпләрдә кызу эш өсте. Ел да мәктәбебез әзерлек буенча призлы урыннар ала иде, быел да сынатмабыз дип уйлыйбыз!

   Каникуллар булуга карамастан мәктәптә бишенче хезмәт чиреге бара.  Бакчабызда бик күптөрле җиләк-җимеш, яшелчә үстерелә, укучылар аларны үстерүдә, вакытында чүбен утап, су сибү эшендә актив катнашлар. Һәр классның үз тәҗрибә бүлекләре , чәчәклекләре бар. Аларны да карап үстерү, башкару укучыларның төп бурычлары  булып тора. Һава торышы да уңайлы торса мул уңыш алырбыз дип өметләнеп торабыз!

  Мәктәпләрдә чыгарылыш кичәләре узды. Безнең мәктәпне дә 4 укучысы 11 сыйныфны уңышлы гына тәмамлап кулларына аттестат алдылар. Шул укучыларның икесе Гайнуллина Илүзә һәм Ганиев Ришат кызыл аттестатка ия булдылар. Шулай ук 9 сыйныфның 8 укучысы да имтиханнарны уңышлы тапшырып аттестатка ия булдылар. Котлыйбыз! Барыр юллары уңышлы булсын! 

  Балаларны саклау көне уңаеннан мәктәпнең укучылары өчен Сабантуй оештырылды. Табигать кочагында укучылар төрле бәйгеләрдә көч сынаштылар, милли уеннарда катнашып тәмле бүләкләр оттылар. Бәйрәм бик күңелле узды!

     11 ләрнең иң җаваплы чорлары башланды. Бүген алар рус теленнән ЕГЭ тапшырдылар. Быелгы имтиханнарда шартлар шактый кырыс һәм катлаулы. Норлат мәктәбендә урнашкан имтихан тапшыру пунктына укучылар тимер тикшергечләр аша узды, шунлыктан телефон белән керү мөмкинлеге бөтенләй булмады. Кабинетларда видеокамералар, Казан һәм Чиләбедән килгән күзәтүчеләр. Мондый шартларда укучылар гына түгел, олылар да югалып калыр иде. Шулай да имтиханнар тыныч узды, инде нәтиҗәләрнең генә уңай булын көтәсе кала!

   Шимбә көнне Күгәй авылында татар-башкорт милли көрәше буенча ярышлар узды. Мәктәбебездә әле яңа гына эшли башлаган көрәш түгәрәгенең 4 егете әлеге ярышта булып кайттылар. 7 класс укучысы Гафиятуллин Рәдис үз авырлыгы үлчәмендә 2 нче урын алуга иреште. Башка егетләр дә сынатмады. Афәрин, егетләр! Алга таба да уңышлы чыгышлар теләп калабыз! 

   Апрель аенда район мәктәп укучылары арасында үзешчән сәнгать көчләре смотры узган иде. Бүген, гомуми линейкада, әлеге бәйгедә уңышлы чыгыш ясаган укучыларны, чыгышларны дипломнар белән бүләкләделәр. Шуны әйтергә кирәк безнең укучыларның барлык чыгышлары да призлы урыннарга лаек булган. Шулай итеп:

Ания Сайфетдинова, Гөлия Абзалина (дуэт җыр) -  2 урын

Гелүсә Гыйбадуллина, Рәзинә Сәйфетдинова (дуэт җыр) - 1 урын

Биюләр (4 класслар һәм 5-6 класслар) -   3 урын

Ансамбль "Тамчыкай" - 3 урын

Фольклор  (10 класс) - 3 урын . Афәрин, дуслар! Котлыйбыз сезне!