Бүген көн гадәттәгечә башланып китте. Тышка чыгу авырлаша. Көн бик эссе. Черкигә  чыдап булмый. Линейкадан соң күңелле зарядка башланды. Зарядкадан соң яңа хәрәкәтле уен өйрәндек.  “Балык, кармак, балыкчы” дип атала. Уен балаларга бик ошады. Аннан соң “Спортландия” иленә сәяхәткә киттек. Нинди генә ярышларда, конкурсларда катнашмадык. Төшке аштан соң интеллектуаль иҗади эш белән шөгыльләндек. Һәр отряд үз газетасын чыгарды. Аннан соң саф һавада спорт уеннары башланды. Шашка буенча лагерь чемпионын ачыкладык. 

        Бу көнне спорт һәм сәламәтлеккә  багышладык. Линейка һәм күңелле зарядкадан соң  хәрәкәтле уеннар уйнадык. Балаларга бигрәк тә “Мәче белән тычкан”, “Энә-җеп-төен”, “Чукрак телефон” уеннары ошады. “Күңелле стартлар” да һәркем җиңү турында хыялланды. Барлык бала да бик актив булды. “Җәй – кыз, җәй - малай” конкурсы бигрәк тә күңелле булды. Анда табигый материалдан, чәчәкләрдән, яфраклардан, үләннәрдән  “ кием тегеп” җәй малае белән җәй кызын киендердек. Алар белән истәлеккә  фотога төштек.

        Төшке аштан соң “Күзләрне ничек сакларга?” дигән презентация-әңгәмә үткәрде. 

Бүген урманга сәяхәт тыныч үтсен өчен “Урманда үзеңне дөрес тоту  кагыйдәләре”н белү буенча ярыш - сәяхәт үткәрдек. Ярышыбыз презентация буенча барды. Шунда ук рәсем конкурсы үтте  - “Урманда җәй”.  “Урманда сәяхәт” күңел ачу спорт ярышы да балаларга ошады. Аннан соң “Убырлыга кунакка”  киттек. Аның белән яңа хәрәкәтле уеннар өйрәндек.

Линейка һәм зарядкадан соң  бүгенге көнне  “Көл – файдасы күп,  бел!” дигән әңгәмә белән башладык һәм  “Без фантазёрлар” дигән темага хыялланып алдык. Лагерьчылар үзләре белән булган кызыклы вакыйларны искә төшереп сөйләделәр.

 Төп эшебез экскурсияләр иде.   Иң беренче Р.Сафиуллинның фермер хуҗалыгына юл тоттык. Анда техника белән таныштык. Ә маллар көтүгә киткән иде. Малларның яши торган җирләрендә булдык.  Аннан соң сервиз хуҗасы Р.Садиков янында булдык. Машиналар ремонтлау процессын күзәттек. Төрле инструмент һәм станоклар белән таныштык. Ә бензозаправкада безне И. Тимергалиев көтеп тора иде. Андагы эш тәртибе белән Илдар  абыйлары таныштырды. Машинага бензин салучы шофёрны күзәттек. Куркынычсызлык кагыйдәләре турында сөйләштек. Төшке аштан соң  “Бу мавыктыргыч хайваннар” дигән викторина үткәрдек. “Минем яраткан хайваным” дигән рәсем конкурсы булды.

           Көнне хәрәкәтле уеннардан башладык. Иң беренче “Йөзек салышлы” милли уенын  уйнадык. “Ватык телефон” да балалар күңеленә хуш килде.  Аннан соң яңа уен “Шалкан”ны өйрәндек.  Иртәнге аштан соң “Разведчиклар” уены башланды. Уен 4 этаптан торды. Һәр этапта җиңүчеләр билгеләнде. Балаларга бигрәк тә карта белән эшләү ошады. Алар карта ярдәмендә яшеренгән предметларны эзләделәр һәм төгәллек белән таптылар.

           Төшке аштан соң футбол уены башланды. Анда “Иң шәп гол кертүче”, “Иң шәп уенчы”ларны билгеләдек. Көнебезне мультсеанс белән төгәлләдек. Көн бик тыгыз үтте.

Бүген иң истә калганы, чәчәк аппликациясе ярдәмендә Россия флагын ясау булды. “Мин яратам сине, Россия!” дигән викторина-презентация үткәрелде. Мәктәп музеена ясаган экскурсиядә балалар  авыл тарихы белән танышты.

Бу көнне балалар бигрәк тә дулкынланып көттеләр. Бүген алар сәяхәткә Яр Чаллы шәһәренә юл тотты. Анда чын дельфиннарны үз күзләре белән күрәселәре бар бит. Без “Дельфинарий”да булдык. Анда дельфиннарның чыгышын тын да алмыйча карадык. Балаларга бик ошады. Табигать кочагында төшке ашны ашадык.

Линейка һәм зарядкадан соң көнебез хәрәкәтле уеннар белән  башланды. “Мульти – тәнәфес” мультфильмын карагач, викторина үткәрдек. “Мульт – якын дуслар” – мультиктан якын дусларын атадылар. Атаклы фраза авторларын әйттеләр. Соңыннан мультфильм геройлары һәм исемнәре буенча “Кызыклы эстафета” үткәрдек. “Минем яраткан мультфильм герое” рәсем конкурсы да бик җанлы үтте.

Бу көнне “Ак калач” һәм “Теремкәй” әкиятләрен заманча итеп куйдык. Төшке аштан соң фотобутофория ясау белән мәш килдек. Алар безгә мәзәкләр кичәсенә кирәк иде. Мәзәкләр кичәсендә “Иң исәр көлүче”, “Иң шәп мәзәкче” ләрне билгеләдек.

Көнебез дару үләннәре турында сөйләшүдән башланды. “Табигать серләре” дигән экологик уен уйнадык. Шунда ук викторина да үткәрдек. Бигрәк тә саф һавада “Джунгли  чакыра” уены балаларга бик ошады. Анда “Соры аюлар ”командасы 28 очко белән җиңүгә иреште. “Уңган куллар”  табигый материаллардан төрле композицияләр  ясадылар.