Бүген без -  Кошман һәм Мөрәле төп мәктәбенең яшь армиячеләре- Федоровск авылында урнашкан картлар һәм инвалидлар йортында җылы очрашуда булып кайттык.Өлкәннәр ункөнлеге кысаларында аларга үзебезнең концерт программабызны тәгъдим иттек,кулдан ясалган бүләкләребезне тапшырдык. Бу очрашу бездә матур һәм җылы тәэсирләр калдырды,ә өлкәннәргә озын гомер,тыныч картлык телибез! 

Бүген Балалар сәнгать мәктәбе мәйданында район мәктәпләре ярминкәсе гөрләде.Ярминкәгә килүчеләр кышка яшелчә, башка төр товарлар сатып алу белән беррәттән, укучыларның “Уңыш” бәйрәмен карап та хозурланды. Мәктәп яны бакчаларында үстерелгән җиләк-җимеш, яшелчәләрдән бик матур композицияләр дә әзерләгән алар. Укучылар җырлы-биюле тамаша аша үз композицияләрен яклады, аларга укытучылары да ярдәм итте. Ярминкә  укучылар катнашындагы концерт белән үрелеп барды.

Бүген башлангыч сыйныф укучылары район мәдәният йортында К.Тинчурин исемендәге Татар дәүләт драма һәм комедия театры артистлары тарафыннан Ш.Фәхретдинов әсәре буенча куелган “ Али баба һәм өч карак” исемле спектакль карадылар. Укучылар бик уңай хисләр белән кайтканнар.

Бүген Бөтенрәсәй олимпиадаларының мәктәп туры башланды.Мәктәбебезнең 5-9 сыйныф укучылары тарихтан олимпиада биремнәре эшләделәр.

Бүген 7-8 сыйныф укычылары дүрт фәннән тестлаштыру үттеләр.Алар рус теле,математика,тагын җиденчеләр тарих,биология,ә сигезенчеләр физика һәм җәмгыять  белеменнән биремнәр эшләделәр.

20 нче сентябрь көнне мәктәбебезнең "Яшь юнармиячеләр"е "Салават күпере"спорт комплексында уздырылган Россия хәрби тарихына багышланган олимпиаданың муниципаль турында катнашып үзләренең көчәрен сынадылар.Алга таба да аларга уңышлар телибез.Илебезнең лаеклы гражданнары булсыннар.

Мәктәбебездә яңа уку елының беренче мәктәпкүләм ата-аналар җыелышы булып узды.Җыелышта уку-укыту һәм тәрбия процессындагы яңалыклар белән тыныштырылды.Авыл фельдшеры Сибгатова Ф. грипка каршы прафилактиканың иң әһәмиятле чарасы прививка булуы турында ата-аналар алдында чыгыш ясады.

Мәктәбебездә укучыларга гриппка каршы вакцинация ясалды.Грипп һөҗүмен булдырмас өчен иң нәтиҗәле ысуллардан булып  вакцинация  тора. Беренче вакцина ачылганнан бирле табиблар меңләгән кеше гомерен саклап кала алалар.  Һәм бүгенге көнгә кадәр вакцинация грипп вирусына каршы  көрәштә  әһәмиятле чара булып тора. Грипптан прививка ясату өчен кулай вакыт  сентябрь- октябрь айлары санала. Гриппның вирусы бик үзгәреп торучан. Нәкъ менә шуңа күрә яңа вакциналар эшләнеп һәм төзелеп тора. Вакцинация өчен  үтерелгән вакциналар кулланыла, шуның өчен прививкадан соң грипп белән авырту күзәтелми. Гриппка каршы прививка 100% ка ук грипптан сакламый, ләкин авырый башлау  мөмкинлеген киметә.Гриппка каршы прививка Дөньякүләм сәламәтлекне соклау оешмасы белән тәкъдим ителә  һәм вирустан бердәнбер  саклану чарасы булып тора.

Бүген башлангыч сыйныф укучылары өчен "Бердәм мәдәни дәрес" үткәрелде һәм көндәлекләр тапшырылды."Укучының мәдәни көндәлеге" балаларны һәм аларның әти-әниләрен мәдәният учакларына барырга кызыксындыру, укучыларны һәм олыларны рухи яктан баету максатын күздә тота. Алай гына да түгел, көндәлек укучыда аралашу күнекмәләрен булдыра, гражданлык позициясен, туган якка мәхәббәт һәм ватанпәрвәрлек хисе тәрбияли. 

“Милләтләр кроссы” – җәйге спорт төрләре буенча Россия территориясендә үтә торган иң зур массакүләм спорт чарасы. Шушы чарада безнең мәктәп тә актив катнашты. Йөгерешчеләр арасында иң җитезләре ачыкланды.