Район күләмендә балалар оешмаларының слеты булып узды. Слетка мәктәбебезнең иң актив укучылары Закирова Гөлүсә, Мубаракова Ләйлә, Ахмадуллина Илүсәләр делегат итеп сайланды. Әлеге укучылар Слетның тантаналы ачылышында катнаштылар. Икенче өлештә грауппаларга бүленеп балалар оешмасының яңа уставын, ел дәвамында узучы конкурс проектарын  тикшерделәр, үзгәрешләр керттеләр. Ахырдан Республика күләменә узачак слетка делегатлар сайлауда катнаштылар. Мәктәбебез укучысы  Мубаракова Ләйлә әлеге слетка бару хокукына ия булды.     

Район күләмендә ООО “Труд” призына 1999 елгы һәм аннан яшьрәкләр арасында татар-башкорт көрәше буенча ярыш булып узды. Әлеге ярышта мәктәбебез командасы 2 урынны яулады. Үз авырлыкларында Хабибуллин Рифнур, Юсупов Руслан, Хабибуллин Руфил- 1урынны; Рафиков Илсаф-2 урынны; Зайцев Тимур, Кузнецов Кирилл, Ризванов Инсаф-3 урынны яуладылар.

Мәктәбездә фән атналыклары оешкан төстә үтә. Бүген иртәнге линейкада тарих атналыгын ачу тантанасы булды. Тарих укытучысы Гөлчәчәк Илфаковна атналыкның программасы белән таныштырды, укучылар көче белән әдәби-музыкаль монтаж куелды.

Район күләмендә фән олимпиадаларының муниципаль этабы бара. Әлеге олимпиадаларда укучыларыбыз актив катнашырга тырыша. Геологиядән узган олимпиадада мәктәбебез укучысы Шәфигуллин Искәндәр призер булды. Искәндәргә алга таба тагын да зуррак уңышларга ирешүен, укытучысы Эльмира Равилевнага да хезмәтендә уңышлар, сәламәтлек теләп калабыз.

Сыйныфларда толерантлык  буенча сыйныф сәгатьләре уздырылды.  Әлеге дәресләрдә укучыларны бер-береңне, янәшә тирәдәгеләрне, төрле милләт кешеләрен хөрмәт итү, сабыр һәм түзем булып кала белү юллары аңлатылды, презентацияләр күрсәтелде.

Мәктәбебездә, традицион рәвештә, татарча көрәш буенча мәктәп беренчелегенә  бәйге уздырылып килә. Бу уку елында әлеге бәйгедә 20 дән артык көрәшче катнашты.  Әлеге ярышны “Яңа тормыш” җәмгыяте финанслады. Авылыбызның шәхси эшмәкәрләре дә әлеге чарадан читтә калмады. Алар көрәшчеләргә үзләренең махсус бүләкләрен тапшырдылар. Шулай ук Яңгул һәм Борнак җирле үзидарә башлыклары да әлеге ярышка үзләренең бүләкләре белән килгән иде. Ярышта җиңгән укучыларга акчалата бүләкләр һәм мәктәп грамоталары тапшырылды.

Район күләмендә рус телендә сочинениеләр конкурсы уздырылды. Әлеге конкурста 8 сыйныф укучысы Ахмадуллина Альбина “Великая Отечественная война в истории моей семьи” исемле сочинение белән җиңү яулады.

Район күләмендә 2003-2004 елгы кызлар арасында волейбол ярышы уздырылды. Әлеге ярышта  мәктәбебезнең волейбол түгәрәгенә йөрүче кызлар командасы 1 урынны алды. Шушы ук ярышта 7 сыйныф укучысы Хайруллина Диләрә “Иң яхшы уенчы” исеменә лаек булды һәм грамота белән бүләкләнде.

Бүген мәктәпкә Н.Э.Бауман исемендәге Казан Дәүләт ветеринария академиясенең зоогигиена кафедрасы мөдире Софронов Владимир Георгиевич  һәм әлеге академиядә белем алучы райондашларыбыз килде. Алар 10-11 сыйныф укучыларына әлеге уку йортына керү тәртибе, андагы факультетлар,  дәрестән тыш уздырылучы түгәрәкләр турында сөйләделәр, укучыларны кызыксындырган сорауларга җаваплар бирделәр.

Мәктәбебездә полиция хезмәткәре белән 5-11 сыйныф укучылары өчен әңгәмә уздырды. Яшүсмерләр арасында булган тәртип бозулар, нинди очракларда мәктәп укучыларының учетка куелуы, велосипед, скутерда йөрү кагыйдәләре турында аңлатты. Соңыннан укучыларны кызыксындырган сорауларга җаваплар бирелде.