Бүген мәктәптә ата-аналар җыелышы үткәрелде. Җыелышта мәктәпнең яңа уку елына әзерлеге, туклануны оештыру, мәктәпнең эчке тәртип кагыйдәләре, мәктәптәге түгәрәкләр һәм спорт секцияләре графигы хакында информация бирелде.Шулай ук грипп профилактикасы,   укучыларның хокук бозуларны кисәтү, 22.00 дән соң урамда йөрмәскә тиешлеге хакында искәртелде. Икенче көн тәртибендә укучыларның социаль челтәрләрдә, нинди сайтларда утыруларын, кемнәр белән аралашуларын әти-әниләр контрольдә тотарга тиешлеге әйтелде. Шулай ук укучыларның гомерен иминиятләштерү  максатыннан Росгосстрах һәм Наско иминиятләштерү кампаниясеннән агентлар чыгышы тыңланды.Җыелыш кабинетларда класс җыелышлары булып дәвам итте. Җыелышка ата-аналарның күп булып килүе, балаларының укуына, тәртибенә битараф булмавы коллективны сөендерде.

Шекә башлангыч мәктәбендә укучыларга мәдәни көндәлек тапшырылды.Укучылар көндәлек белән танышып, нәрсәләр эшләячәкләрен планлаштырдылар. Көндәлек бик үзенчәлекле, матур, укучыларны җәлеп итә торган итеп эшләнелгән. 

    17 сентябрь көнне "Самостоятельные дети" проектында катнашучылар сәламәт яшәү рәвешен пропагандалап "Поделись улыбкой-Елмаюың белән бүлеш!" акциясен үткәрделәр. Укучылар үтеп баручыларга яхшы кәеф бүләк итүче смайликлар өләштеләр, тәмәке тарту һәм  алкогольле эчемлекләр куллануның зарары хакында сөйләделәр.

   Бүген Шушмабаш мәктәбе "Казан" агропромпаркында республика ярминкәсендә катнашты. Мул итеп җыелган уңыш зәвык белән бизәлгән матур контейнерларга  урнашып сатып алучыларны ерактан үзенә җәлеп итте.Шәһәр халкы үзенә кыш буе җитәрлек яшелчә, җиләк-җимеш белән запасланды, бәйрәм атмосферасы явып узган яңгырларга да карамыйча көн буе дәвам итте.

Республикакүләм үткәрелгән "Көзге мәрхәмәтлелек атналыгы -мәрхәмәтле эшләр эстафетасы" акциясе кысаларында, “Җир шарыбыз-безнең уртак йортыбыз”-дигән темага, мәктәптә төрле класстан тыш чаралар үткәрелде. Туган ягыбызның табигатен саклау, табигый байлыкларын сакчыл куллану безнең изге бурычыбыз. 

Шимбә көнне Казан шәһәрендә үткәреләсе ярминкәгә мәктәптә зур әзерлекләр бара. Мәктәп яны бакчасында үстерелгән кишер, чөгендер, кәбестә, помидор , кыярларны күп итеп сатуга әзерләдек.

Мәктәбебезнең укучылары тырышып уку белән беррәттән, дәресләрдән соң буш вакытларында авылның, истәлекле урыннарының, чишмә, елга буйларының чисталыгын булдыру максатыннан даими эш алып баралар. 

Тиздән “Өлкәннәр көне” килеп җитә. Инде безнең мәктәптә бу көнгә әзерлек эшләре алып барыла. Театр түгәрәге җитәкчесе Вильданова Гөлфия Шамилевна укучылар белән спектакль, башлангыч класс укытучылары һәм тәрбиячеләре бәйрәм концерты әзерлиләр.  Традиция буенча елда үткәрелеп килгән бу чаралар, өлкәннәребез өчен зур бүләк.