Укытучы гомер буе укый - өйрәнә - бу барлык кешеләргә дә билгеле чынбарлык. Укытучы һәрвакыт үсештә һәм барлык эшләү дәверен эзләнеп үткәрә. Бары тик фәнни - методик эшчәнлеге, эзләнүләре укытучыны профессионал дәрәҗәсенә үстерә ала.

    Кем ул укытучы – профессионал?  Ирланд педагогы Эндрю Берк бу турыда менә нәрсә дигән: “Профессионал – ул шундый кеше, кем билгеле бер шартларда эшли ала, кем икеләнүләрен җиңә, тәҗрибәле , кыю рәвештә карарлар кабул итә, аларны нәтиҗәле куллана, әгәр ул карарлар дөрес булмаса  я эшләмәсә, аларны үзгәртергә көче җитә.”

    Алдагы юллар нәкъ менә безнең мәктәбебезне быелгы уку елында тагын бер биеклеккә күтәрү өчен үзенең бөтен көчен куйган, бар иҗатын эшкә җиккән, чын мәгънәсендә  заманча күркәм  укытучы булган - коллегабыз Чулпан Миннуловна Самигуллина турында.

    Чулпан Миннуловна конкурсның һәр этабында үзенең искитмәле хезмәтен матур тәкъдим итә белде. Һәр турдан югары баллар һәм көчле алкышлар, сокланулар җыйды. Коллегабыз үзен  горур  йөртерлек лаеклы урын яулады.

Чын күңелебездән аны котлап, куанабыз һәм горурланабыз.

    Укытучының бөтен гомере балалар күз алдында үтә. Алар хәтер көндәлекләренә үзләренең билгеләрен куеп баралар. Педагогның эшен аның профессионал осталыгы, берәүне дә аерып карамыйча яратуы, хөрмәте характерлый.

   Укыту - тәрбия процессы мәшәкатьле, ыгы-зыгылы, тынгысыз процесс.

Ул сабырлык, түземлек, ягымлылык сорый. Болардан башка укытучы беркайчан да талантлы да, остаз да, профессионал да була алмый. Коллегабызны Ходай менә шушы сыйфатлар белән бүләкләгән  дә инде.

   Эшеңдә дә, тормышыңда да уңышлар сиңа  Чулпан Миннуловна!

Бүген 1 сыйныфта  узган  тәрбия сәгатендә укучылар дуслык серләренә төшенделәр. Эш барышында балаларга Абдулла Алишның "Чукмар белән Тукмар" әкияте күрсәтелде. Төрле сораулар . мавыктыргыч биремнәр  аша дуслыкның мөһимлегенә басым ясалды.

Бүген 1 класс укучыларының әти-әниләре балаларын "Укучылар сафына кабул итү" тантанасына җыелдылар. Бу көнне балалар югары әзерлек белән зарыгып көтте. Бәйрәмнең бизәге булган Белмәмеш укучыларга төрле биремнәр. кызыклы мәсьәләләр тәкъдим итте. Бәйрәм матур җырлар, шигырьләр белән үрелеп барды.

Дәресләр төгәлләнгәннән соң укучыларны бүген культуралы ял көтте. Түгәрәк җитәкчесе Вильданова Г.Ш. җитәкчелегендә 2-3 класс укучылары Ф.Яруллинның "Баз бакасы" исемле спектаклен сәхнәләштерде.  Сәхнә бизәлеше, матур костюмнар, җырлы-биюле күренешләр тамашачыны үзенә җәлеп итте. Афәрин!

4 класс укучылары укытучылары Сөнгатуллина Ф.М. белән берлектә мәктәбебез укытучыларына рус теле дәресе күрсәттеләр. Дәрестә чит телдән кергән сүзләрнең дөрес әйтелешенә һәм язылышына басым ясалды. Сингапур структуралары аша биремнәрнең катлаулылыгы сизелмәде дә. Һәркемгә үрнәк алырлык бу дәрес күңелләрдә якты тәэсирләр калдырды.

Атналык кысаларында  башлангычлар өлешендә төрледән-төрле күргәзмәләр эшли. "Кем дәфтәре иң шат йөзле?"  исемле күргәзмәдә иң пөхтә, иң матур язучы укучыларыбызның дәфтәрләре урын алды. "Балачак әдипләре иҗаты белән танышабыз" күргәзмәсендә укучыларга төрле шагыйрь һәм язучыларның әсәрләре белән танышу мөмкинлеге тудырылды.

3 сыйныфта Габитова Л.М. тарафыннан "Мин - бала, мин - кеше" исемле тәрбия сәгате уздырылды. Эш барышында укучыларга мультфильм геройлары аша үзләренең хокук һәм бурычлары аңлатылды. Матур һәм эчтәлекле чара өчен укытучыга рәхмәтебезне җиткерәбез.

Башлангыч сыйныфлар атналыгы кысаларында бүген дә төрле кызыклы һәм файдалы  чаралар уздырылды. 2 сыйныфта Зайнагова Л.Р. математикадан ачык дәрес күрсәтте. Укучылар  практик эшләр аша күппочмак периметрын табарга өйрәнде.  ФГОС таләпләренә туры китереп, укучыларның яшь һәм психологик үзенчәлекләрен исәпкә алып төзелгән бу дәрес бик матур һәм нәтиҗәле булды. 1 сыйныфта  Тазетдинова Г.Р. тарафыннан уздырылган математика дәресе дә һәркемдә уңай фикерләр калдырды. Мавыктыргыч уеннар аша укучылар теманы яхшы үзләштерде. 4 сыйныфта (укытучы - Сөнгатуллина Ф.М.) уздырылган сыйныф сәгате дә беркемне дә битараф калдырмады. "Гаиләле булу - бәхет" дип аталган әлеге чарада укучылар әти-әни кадерен белергә өйрәнделәр, үрнәк гаилә төзү серләренә төшенделәр. Көн ахырында Шекә башлангыч мәктәбе укытучылары катнашында  методик берләшмә утырышы уздырылды. Тәҗрибә уртаклашу һәркемгә файдалы булды.

Башлангыч сыйныфлар атналыгы дәвам итә. 2 класста   Зайнагова Л.Р.  "Туган телем - иркә гөлем" темасына ачык класс сәгате уздырды. Дәресләрдән соң Шавалиева Г.Ф. "Әкият юлыннан..." дип исемләнгән класстан тыш чарага чакырды. Кино елы уңаеннан укучылар "Хатико - самый верный друг" дип исемләнгән фильм карадылар."Исәнме, кыш" дип исемләнгән рәсем күргәзмәсе үз эшен дәвам итте. Бүгенге чаралар укучыларның күңелендә озак сакланыр.