5 - 6  сыйныф укучылары Әфган сугышында  катнашкан авылдашларыбызны искә алды, аларның истәлекләре белән танышты. Ил кушканны, хәрби бурычын  үтәүчеләрне  без һәрчак хәтердә сакларга тиешбез.

Район күләмендә укучылар арасында үткәрелгән"Искиткеч әйдаман" бәйгесендә  9 сыйныф укучысы Гарифуллина И. катнашты һәм " Иң креатив әйдаман" номинациясендә җиңүче булды. Индираны һәм аның җитәкчесе Нуриева Т.Н. ны уңышлары белән котлыйбыз!

Арча сәнгать мәктәбендә "Арча йолдызлары" конкурс-фестиваленең сайлап алу туры узды. Конкурста катнашкан барлык укучыларыбызга зур рәхмәтебезне белдерәбез, киләчәктә унышлар телибез!

     Татар теле... Тугач та иң газиз кешеңнән ишетә башлаган, күп гасырлык тарихы булган, Каюм Насыйрилар, Тукайлар нигез салган, 7 миллион халык сөйләшкән, дөньядагы иң дәрәҗәле 14 тел исәбенә кергән, чит илләрдә дә өйрәнелә торган, бүгенге көндә җитлеккән, камилләшкән, теләсә нинди катлаулы фәнне өйрәтергә мөмкинлеге булган, Моабитның таш диварлары эчендә дә тынмыйча, аның калын стеналарын тишеп чыгып, бөтен дөньяга яңгыраган, утларга-суларга салсалар да, чукындырсалар да, ассалар – киссәләр дә исән калган, иң-иң авыр кимсетүләргә дә түзгән, сынмаган-сыгылмаган, баш имәгән горур татар теле!  Бүген 2 нче сыйныфта узган  класс сәгате шул темага багышланды. Татар халкының тарихына, әдипләребез иҗатына, татар телендә чыга торган газета - журналларга күзәтү ясалды.

Башлангыч сыйныф укучылары физик  күнегүләр буенча ГТО нормативларын тапшырдылар.

5 нче сыйныф укучысы Нәбиев Наил 6, 7 февраль көннәрендә Ижевск шәһәрендә үткән кекушин каратэ буенча Россия чемпионатында 1 урын яулап кайтты. Наил Балтач спорт мәктәбендә шөгылләнә. Наилне зур җиңүе белән котлыйбыз, киләчәктә дә уңышлар телибез!

Бүген Арчаның 6 нчы номерлы урта мәктәбендә районкүләм мәктәп театр коллективларын " Театр яктылыкка, нурга илтә" бәйге - фестиваль җиңүчеләрен бүләкләү тантанасы үтте. Безнең мәктәпнең " Тамчы" театр коллективы гран - прига лаек булды. Алар Абдулла Алишның " Сертотмас үрдәк" әкиятен сәхнәләштерделәр. Театрның җитәкчесе: Гозәерова Л.Г. Котлыйбыз! Киләчәктә дә уңышлар телибез!

Әлеге проект кысаларында без күренкле авылдашыбыз Әхмәтов Марат Готыф улының нәсел буыннарын барлап, шәҗәрә агачын төзедек.