Бүген озынайтылган көн төркеме тәрбиячесе Гайсина Фәүзия Марсель кызы кызлар һәм малайлар арасында пионербол ярышы уздырды. Малайлар төркеме кызлар төркемен җиңде. Иң шәп уйнаучы малай - Миннуллин Камил, иң шәп уйнаучы кыз - Марданова Назгөл дип билгеләнде.

Мәктәбебездә татар теле атналыгы дәвам итә. Зарипова Зөлфия Флер кызы укучыларыбызга  "Язмышларга буйсынмас җаннар" дигән бик матур чара күрсәтте. Авыр язмышка дучар булган, гомерләрен урын өстендә яисә инвалид коляскасында үткәрүче шагыйрьләр, язучылар, рәссамнар арасында Фатих Әмирхан,  Кәүсәрия Шафикова, Рәфис Мөхәммәтдинов, Гакыйль Сәгыйров, Фәнис Яруллин турында видеоязмалар карадык, аларның сүзләренә иҗат ителгән җырлар тыңладык. Укучылар аларның шигырьләрен сөйләделәр. Бүгенге батырлык, "Тыныч көндәге батырлык" дигәндә, без язмышның, каты сынауларын җиңеп чыга алырдай, көчле ихтыярлы, изге җанлы шәхесләребезне күз алдына китерәбез. Зөлфия Флер кызы безгә барыбызга да тормыш сынауларына сыгылмаска, көчле рухлы шәхес булып калырга өндәде.

Бүген безнең мәктәбебездә "23 февраль - Ватанны саклаучылар көне" белән кадерле ир-егетләребезне һәм хөрмәтле укытучы абыйларыбызны котлап, кызлар концерт куйдылар. Без аларга алдагы тормышларында куаныч-шатлыклар, эшләрендә һәм укуларында зур уңышлар, корычтай нык сәламәтлек, ак бәхетләр теләп калабыз! Киләсе көннәрегез аяз, барасы юлларыгыз якты булсын!

Бүген мәктәбебездә "Туган тел көне"н билгеләп үттек. Татар теле һәм әдәбияты укытучысы Габдуллина Альфира Биҗан кызы туган телебезне кадерләргә, онытмаска, сакларга өндәде. Укучылар татар теле турында шигырьләр сөйләделәр, җырлар җырладылар. Бөек шагыйребез Габдулла Тукайның "Туган тел" җырын укучылар да, укытучылар да аягүрә басып башкардылар. Без - Тукай оныклары! Безнең туган телебез - татар теле! Без шуның белән горурланабыз!

Бүген мәктәбебездә физкультура һәм тормыш иминлеге нигезләре  укытучысы Хаков Басыйр Фәйзелхак улы җитәкчелегендә  "Аҗаган" хәрби-патриотик уены булып узды. Укучылар үзләренең җитезлекләрен, тапкырлыкларын, көчләрен күрсәттеләр.

Бүген безнең укучыларыбыз авылыбызның мәдәният йорты хезмәткәрләре белән "Тел көне"н билгеләп үттеләр. Алар татар халкыбызның милли "Исем кушу" йоласын сәхнәләштерделәр, ике командага бүленеп, үзләренең зирәклекләрен һәм тапкырлыкларын  күрсәттеләр. "Әллүки" командасы 33 кә 30 белән "Балачак"  командасын җиңеп чыкты.

Бүген мәктәбебездә чаңгы ярышлары бик күңелле узды. 5-11 сыйныф укучылары чаңгы юлларында үзләренең тизлекләре, җитезлекләре  белән күпләрне шаккаттырдылар. Физкультура укытучысы Хаков Басыйр Фәйзелхак улы җиңүчеләрне грамоталар белән бүләкләде.

 Мәктәбебездә татар теле һәм әдәбияты укытучысы Рәхимова Гөлүзә Әзһәм кызы "Афзал Шамовның хикәяләрендә ватанпәрвәрлек һәм кешелеклелек сыйфатлары ачылу" дигән темага виртуаль музейга сәяхәт оештырды.  Афзал Шамов - татар әдәбиятында оригиналь проза әсәрләре: хикәяләр һәм повестьлар авторы буларак танылган язучы. Аның егерменче еллар татар авылы тормышына багышланган "Рәүфә" әсәреннән укучыларыбыз сәхнәләштерелгән өзек күрсәттеләр, күргәзмә карадылар.

Безнең мәктәбебездә бүген 7-8 сыйныф укучылары арасында баскетбол ярышлары булды. Аны физкультура укытучысы Хаков Басыйр Фәйзелхак улы үткәрде.

Китапханәчебез Фатыйхова Фәнисә Гафурҗан кызы башлангыч сыйныф укучыларына Муса Җәлилнең тормыш юлы, аның иҗаты турында сөйләп, күңелнең иң түренә үтеп керде. Укучылар герой шагыйрь турында презентацияләр карадылар, викторина сорауларына җавап бирделәр, ятлаган шигырьләрен сөйләделәр.