18 декабрьдә “Өстенлек мәктәбе” ндә Лениногорск муниципаль районының татар теле һәм әдәбияты укытучылары өчен “Заманча дәреснең нәтиҗәлелеген күтәрү максатыннан Сингапур укыту алымнарын куллану” темасына семинар үткәрелде. Мәктәбебезнең татар теле һәм әдәбияты укытучылары Аскарова Ә.Я., Миннегулова Э.А., Исмагилова Г.Ш., Илалова Ф.З. Сингапур структураларын һәм алымнарын кулланып ачык дәресләр күрсәттеләр. Дәресләр барышында укучылар төркемнәргә бүленеп эшләделәр.Укытучы биргән сораулар һәм биремнәрне бергәләп чиштеләр. Бу эштә һәрбер укучы катнашты, үз фикерен әйтте, шул ук вакытта башкаларның да фикерен тыңлый белергә өйрәнде.
Дәресләрдә укытучыларның структураларны кулланып эшләү осталыклары да күзәтелде. Үткәрелгән дәресләр килгән кунаклар тарафыннан уңай яктан бәяләнде.
Дәресләрдән соң түгәрәк өстәл оештырылды. Милли һәм тәрбия эшләре буенча директор урынбасары З.Ә. Ялалтдинова килгән кунакларны “Өстенлек мәктәбе”нең эш тәҗрибәсе белән таныштырды. Мәктәпнең кискен, тәнкыйди фикер йөртү юнәлешендә эшләвен ассызыклады. Ул бу юнәлештә эшләү- укыту процессын яңартырга, укытуның сыйфатын күтәрүгә, укучыларның гына түгел, ә укытучыларның үзләренең дә активлыгын арттырырга ярдәм итүе турында сөйләде.
Мәгариф идарәсенең милли мәгариф өчен җаваплы методисты Л.Г. Рамазанова татар теле укытучылары алдында “Үзара хезмәттәшлектә Сингапур алымнарын кулланып белем бирү” темасын яктыртты. Укытучыларны заманча дәреснең нәтиҗәлелеген күтәрү максатыннан Сингапур укыту алымнарын кулланырга өндәде. Хәтта, Сингапур алымнарын кулланып укытучылар белән тренинг үткәрде. Эш барышында ФИНК РАЙТ РАУНД РОБИН, ТАЙМД ПЭА ШЭА, СТЕЗЕ КЛАСС кебек структуралар кулланылды. Түгәрәк өстәл күтәренке рухта ТИМ ЧИР белән тәмамланды. Килгән кунакларга һәм дәрес күрсәткән укытучыларыбызга бик зур рәхмәт!