Семинарда Лениногорск шәһәренең татар теле һәм әдәбияты укытучылары, Бөгелмә шәһәре һәм Чирмешән районының Бәркәтә урта мәктәбенең  татар теле һәм әдәбияты укытучылары катнашты. Мәктәбебезнең татар теле һәм әдәбияты  укытучысы Эльвира Әсхәт кызы Миннегулова сингапур структурасын кулланып, 3М (рус төркеме) сыйныфында ,,Безнең авыл бакчасы” темасына дәрес-сәяхәт күрсәтте. Якташыбыз шагыйрә  Рәмзия Габделхакова белән очрашуга багышланган  бик эчтәлекле һәм кызыклы  сыйныфтан тыш чара оештырылды. Чарада 2-11 сыйныфларның татар һәм рус төркемнәрендә укучылар катнашты. Бу кичәдә шагыйрәнең шигырьләре, җырлары яңгырады. Бигрәк тә Азат һәм Алия Кашаповлар башкаруында дәртле татар биюе бөтенесенең  күңеленә хуш килде. Кичә барышында кунагыбыз Рәмзия Габделхаковага да сүз бирелде. Ул үзенең иҗаты белән таныштырды, шигырьләрен укыды. Укучыларыбызга үзенең киңәшләрен җиткерде.

Семинарның теоретик өлешендә Бөгелмәдән, Чирмешәннән килгән кунаклар  чыгыш ясадылар. Алар укыту-тәрбия процессында белем чыганакларына таянып, Рәмзия Габделхакованың иҗатын куллану турында сөйләделәр. Чыгышлар бик эчтәлекле булды. Семинарыбыз мәктәп музеена сәяхәт белән тәмамланды.

      Якташыбыз шагыйрә Рәмзия Габделхакованы киләчәк юбилее белән котлыйбыз. Аңа сәламәтлек, иҗатында зур уңышлар телибез!