Хөрмәтле Лилия Тәлгатовна! 50 яшьлек алтын юбилеегыз белән ихлас күңелдән кайнар котлыйбыз. Сезгә озын гомер, бәхет-шатлыклар, җан тынычлыгы, тән сихәте, саулык-сәламәтлек телибез. Кайгы-хәсрәткә бирешми, һаман шулай көчле рухлы һәм ярдәмчел, изге күңелле, балагызның игелеген күреп озак яшәргә насыйп булсын. Рәхмәтләргә һәм рәхәтләргә төренеп яшәгез. 

Бүгеннән без көтеп алган  мәктәп яны лагере үз ишекләрен ачты. Анда безне берсеннән - берсе мавыктыргыч көннәр көтә. 

1нче июнь — Халыкара балаларны яклау көне. Календарьда кызыл белән билгеләнмәсә дә, бу көн аеруча истәлекле булып күңелгә кереп кала. Чөнки безнең районда әлеге бәйрәмне күңелле итеп үткәрүгә зур әһәмият бирәләр. Ел саен районыбызның Сабантуй мәйданында слет үткәрелә. Бу бәйрәмдә ел дәвамында Республика, Россия һ.б. җирләрдә чыгыш ясап, урын алган укучыларыбыз бүләкләнә. Ә аннан соң барлык укучылар өчен  кече балалар Сабантуй бәйрәме үткәрелә. Бүләкләнүчеләр арасында безнең мәктәп укучылары да бар: Мадаминова Асия, Гермашин Тимофей, Әхмәтҗанов Ислам, Гыйләҗева Язилә, Шәрәфиева Әдилә, Сафина Илсинә. Уңышлар сезгә, укучылар!

30 нчы май көнне  “Куркынычсыз җәй” темасына дәрес үткәрелде. Дәрестә укучылар җәйге ял көннәрендә табигатьтә үз-үзеңне тоту, юлда йөрү кагыйдәләре, иминлекне саклау кагыйдәләрен искә төшерделәр. Беренче ярдәм күрсәтү, кояштан саклану, сулыкларда үз-үзеңне тоту турында видеороликлар карадылар.  Дәрес ахырында укучыларга имин ял көннәре теләп, инструктажлар уздырылды. 

Бүген барыбыз өчен дә тантаналы, бераз моңсу, шул ук вакытта шатлыклы һәм истәлекле көннәрнең берсе. Бүген чыгарылыш сыйныф укучылары өчен соңгы кыңгырау яңгыраячак. Бу олы тормышка беренче адым дигән сүз. Шуңа да адымнар ныклы, дөрес һәм ышанычлы булсын иде. 

Очучы А.П.Маресьевның тууына 100 ел уңаеннан, мәктәптә сыйныф сәгатьләре үткәрелде. Укучыларга аның биографиясе, тормыш юлы, башкарган батырлыклары турында тулы мәгълүмат бирелде.

4 нче сыйныф укучылары әйләнә -тирә дөнья фәненнән тикшерү эше язалар.

19 май - пионер оешмасының туган көне. Шул уңайдан бу көнне укучылар өчен зур бәйрәм оештырыла. Тантаналы линейкадан соң поход. Ә походта исә төрле мавыктыргыч уеннар, эшләр йөкләнә. Син монда да сынатырга тиеш түгел. 

2009 елдан башлап Россия Федерациясендә 17 майда Халыкара балалар ышаныч телефоны көне үткәрелә. Бу чара балалар хокукларын бозу очракларын ачыкларга, балалар белән ата-аналар мөнәсәбәтен җайга салырга ярдәм итә.

Мәктәптә әлеге уңайдан ышаныч телефоны эшчәнлеге турында балалар һәм ата-аналар белән лекцияләр, әңгәмәләр, авылыбыз урамнарында акцияләр, “Миңа Ышаныч телефоны ничек ярдәм итте” дигән темага  сыйныф сәгатьләре үткәрелде. 

Тату гаилә - бәхетле гаилә, ди халык. Нәрсә соң ул гаилә? Бер социолог аны “җанга шифалы ял” дигән, ә икенчесе “психологик сыену урыны” дип атаган. Әйе, кешенең иң зур бәхете - аның гаиләсе. Шуңа да БМО Генераль Ассамблеясенең 1993 елның 20 сентябре карары нигезендә, 1994 елдан башлап 15 май Халыкара гаилә көне буларак билгеләп үтелә. Шул уңайдан мәктәбебездә сыйныф сәгатьләре үткәрелде, иҗади эшләр башкарылды.