Туган тел айлыгы уңаеннан бүген мәктәбебездә "Мин татарча сөйләшәм!" акциясе узды. Укучылар бу көнне түшләренә акция эмблемасын тагып йөрде һәм бары тик үз туган телебездә генә аралашырга тырышты.

Җиңүнең 70 еллыгына әзерлек дәвам итә.

Бу атнада мәктәбебез кайнап торды,кызыл канәфер чәчәкләренә күмелде, чөнки мәктәпнең һәр укучысы  үз куллары белән кызыл канәфер чәчәкләре ясады.

Җиңү бәйрәме көнне укучылар бу чәчәкләрне  сугышта һәлак булган бабаларыбыз истәлегенә салынган һәйкәлгә куячак.

10 нчы апрель көнне Баулы шәһәренең "Ватан" клубында  Яшьләр үзәге  югары сыйныф укучылары өчен "Весенняя добровольческая школа- 2015" укулары үткәрде. Безнең мәктәптән бу чарада 8 нче сыйныф укучылары Фазлеев Айбулат, Давлетшин Кәрим, Фатхутдинова Миләүшә катнашты.

Бүген Ф. Яруллин музей-йортында "Әткәй төсе тыныч көннәрдә..." дип исемләнгән кичә узды. Кичә Фәнис аганың сугышта һәлак булган әтисе Гатаулла абыйның фронт хатлары белән бәйләп алып барылды.

Бу чарада  35 ел гомерен Баулы шәһәрендә баларга инглиз теле укытуга багышлаган, бүгенге көндә лаеклы ялда булган Миннуллина Галина Васильевна да катнашты. Галина Васильевна балалар өчен Фәнис Яруллинның "Яз кайда кышлый?" исемле әкиятен ,инглиз теленә тәрҗемә итеп, китап итеп бастырып чыгарган.  Ул ,укучылар белән җанлы әңгәмә корып, истәлеккә китапларын бүләк итте. 

 Кичә бик эчтәлекле булды, укучыларга бик ошады.

Бүген авылыбыз китапханәсендә "Зур сугышның нәни  геройлары" дип исемләнгән Батырлык сәгате үтте. Ул сугыш елларында өлкәннәр белән беррәттән зур батырлыклар күрсәткән герой-пионерларга багышланган иде.

Китапханәче Зөлфия Рафаил кызы укучыларга герой -пионерлар турында сөйләде, презентация күрсәтте. Укучылар сугыш турында, сугыш елларында балалар күрсәткән батырлыклар турында шигырьләр сөйләделәр. Соңыннан бергәләп викторина уенында катнаштылар.

10 нчы апрель көнне мәктәптә Космонавтика көне уңаеннан 7нче, 8нче сыйныф укучылары арасында "Йолдызлы сәгать" уены үтте . 

Физика укытучысы Ландыш Равилевна укучыларга космонавтика турында сөйләде, презентация күрсәтте.

Уен бик кызыклы үтте. Нәтиҗәдә ике команданың  да баллары тигез дип табылды.

9 нчы апрель көнне Баулы шәһәренең 7 нче санлы урта мәктәбендә  Җиңүнең 70-еллыгы уңаеннан район мәктәпләре укучыларының  гала- концерты  үтте. Анда безнең мәктәпнең икенче сыйныф укучылары җырлады.

7 нче апрель көнне Баулы шәһәренең 5 нче санлы урта мәктәбендә "Менеджер" эшлекле уены үтте. Анда барлыгы 9 район мәктәбе катнашты. Бу уенда безнең мәктәп укучылары да чыгыш ясады.

Бүген мәктәпкә Баулы шәһәренең Эш белән тәэмин итү үзәге вәкилләре килеп, 9 нчы, 11 нче сыйныф укучылары белән профориентацион эш алып бардылар.

Җиңүнең 70-еллыгы уңаеннан, һәр атнаның линейкасында укучылар  фронт  хатлары укыйлар. Аны һәр атнада бер сыйныф әзерли.