Җәйнең бер матур көнен без "Тапкырлар һәм зирәкләр" көне дип атадык. Ул көнне бик күп төрле табышмак һәм башваткычлар чиштек, төрле кызыклы сорауларга бергәләп җаваплар эзләдек. Музыка җитәкчесе Дамира Дамировна уздырган "Бу нинди уен коралы?" дип исемләнгән интеллектуал очрашу бик мавыктыргыч һәм дә файдалы булды, чөнки балалар үзләрен серле музыка кораллары илендә хис иттеләр.  Алар уен коралларының исемнәрен генә түгел, аларның тавышларын да танып әйттеләр, үзләре дә әлеге уен кораллары турында табышмаклар төзеделәр.

Беренче кечкенәләр төркеме балаларын клоун үзенә кунакка чакырды. Балалар аның белән бергә төрле уеннарда катнашып күңел ачтылар. 

Зурлар төркемендә бәйрәмнән бер күренеш.

Чалмабаш, хуш исле чәчкәләр –

Алсулар, кызгылтлар һәм аклар.

Никадәр гүзәллек, нәфислек,

Алардан сибелә саф хисләр.

Көнебезне һәр көн саф һавада иртәнге гимнастика белән башлыйбыз.

Йөгерәбез, сикерәбез

Тыныч кына атлыйбыз.

Киң итеп сулыш алабыз - 

Чыныгабыз, ныгыйбыз!

Нәниләрнең иң яраткан шөгыльләре - комлыкта уйнау. Ком төрле тәҗрибәләр, эзләнүләр аша үзенең төрле сыйфатлары белән танышу мөмкинлеге генә бирми. Ул балада уңай хисләр тудыра, табигатъне өйрәнүгә кызыксыну, кайгырту теләге формалаштыра.

Зурлар төркеме балалары вакытны бушка уздырмый. Күптән түгел чәчкән орлыклар су сипкәч җылы кояш нуры астында тишелеп тә чыкты. Эх, тизрәк үстерәсе иде, үзләрен!

31 нче май көнне бакчабызда милли бәйрәмебез - Сабан туе гөрләп узды.

Сабан туе - хезмәт туе.

Шатлык һәм бәхет туе шул,

Уйнап, биеп, җырлап, көлеп

Бәйрәм иттек көн буе.

30 нчы май көнне балалар бакчасында гомуми һәм төркем әти-әни җыелышлары узды. Җәйгә эш планнары, чыныктыру чаралары, балаларның тормыш иминлекләрен тәэмин итү буенча инструктажлар көн тәртипләренә кертелде. Шулай ук әти-әниләр игътибарына 1 нче июньнән балалар туклануын оештыруда яңалыклар - балалар бакчасының әлеге юнәлештә экспериментта катнашуы буенча тулы мәгълумат җиткерелде.

Халыкара гаилә көне уңаеннан балалар бакчасының I нче зурлар төркеме тәрбиячесе Ахмадуллина Ф.Ф. бик эчтәлекле "Гаилә кыйммәтләре" темасына балалар белән эшчәнлек үткәрде. Әлеге чарада районның социаль яклау бүлегеннән психолог  Салахова Г.Н. катнашты. Чараның төп максаты: гаиләнең милли гореф-гадәтләренә нигезләп рухи-әхлакый кыйммәтен, җәмгыяттә тоткан ролен үстерү, балалар бакчасы белән гаиләләрнең хезмәттәшлеген ныгыту.