Бүген 9 нчы класс укучылары өчен иң җаваплы көн. Алар җәмгыять белеме фәненнән имтихан тапшыралар. Укучыларыбызга уңышлар телибез!

Дәшә серле юллар,

Башта төрле уйлар,

Яшь йөрәктә чыңлый мең сорау.

Якты юллар теләп,

Матурлыкка өндәп

Саубуллаша көмеш кыңгырау.

Бүген мәктәбебезнең 9 нчы класс укучылары өчен соңгы кыңгырау яңгырады. Бәйрәмгә килгән кунаклар аларга иң җылы теләкләрен, котлауларын җиткерделәр.

Бүген мәктәбебезнең 6 нчы сыйныф укучылары Тукай - Кырлай авылында урнашкан бөек татар шагыйре Г. Тукайның музей - комплексында булдылар, яңа экспозицияләр белән таныштылар. Театральләштерелгән әкият геройлары белән Г. Тукайның әсәрләренә күзәтү ясадылар, Сәгъди абзый йортында кунакта булдылар, кечкенә Апушның чишмәсенә сәяхәт иттеләр. Укучыларга әлеге сәяхәт бик ошады. Оештыручыларга, экскурсия җитәкчеләренә зур рәхмәтебезне белдерәбез!

Бүген Урта Курса мәдәният йортында мәгърифәтче авылдашыбыз, күренекле татар галиме, дин белгече Габденнасыйр Курсавига багышланган I Бөтенроссия фәнни—гамәли конференция - “Курсави укулары” булды. Әлеге конференция “Авыл җирендә татар мәхәлләсе үсеше: дини мирас һәм татар мәгърифәтчелеге” темасы буенча үтте. “Курсави укулары” нда Татарстан Республикасы мөфтие Камил хәзрәт Сәмигуллин, Татарстанның баш казые, Балтач районы имам—мөхтәсибе Җәлил хәзрәт Фазлыев, филология фәннәре докторы, профессор Мирфатыйх Зәкиев, КФУ доценты, филология фәннәре кандидаты Илһам Фәттахов, конференцияне оештыручы аспирант, “Мирас” нәшрият йорты директоры Александр Долгов, район башкарма комитеты җитәкчесенең урынбасары Рамил Гарифҗанов, район мәдәният бүлеге җитәкчесе Рамил Мөхетдинов, галимнәр, дин әһелләре, җирлек җитәкчеләре, авылыбызның имам-хатибы Равил хәзрәт, авыл халкы, мәктәп коллективы һ.б. катнашты. Утырышны татар энциклопедиясе һәм төбәкне өйрәнү институты директоры, КФУ профессоры Искәндәр Аяз улы Гыйләҗев алып барды. Әлеге зур чарага Арча ягы зыялыларына багышлап “Казан арты” тарих-этнография музееның әдәбият һәм сәнгать бүлеге бик бай, эчтәлекле күргәзмә дә оештырган иде. Конференция резолюциясендә Г. Курсави укыткан мәдрәсә бинасын төзекләндерү, Курсави укуларын оештыруны традициягә әйләндерү һ.б. мәсьәләләр кабул ителде.

20 нче май көнне Арчаның сәнгать мәктәбендә хокук бозуларны кисәтү буенча районкүләм конкурс узды. Әлеге конкурска һәр мәктәп үзенең театральләштерелгән чыгышын тәкъдим итте. Мәктәбебез командасы Н.Җамалиның "Мин кайттым!" исемле пьесасын сәнәләштергән иде. Бәйгедә укучыларыбыз сынатмадылар, 3 нче урынны яуладылар. (Җитәкчеләре - Садриева Н.З.) Аларны җиңүләре белән котлыйбыз!  

19 майда Пионерия көне уңаенан Арча укучылар Сарае асфальтта рәсем ясау конкурсы үткәрде. Әлеге чарада мәктәбебезнең 6 нчы класс укучысы Бикбаева Адилә катнашты һәм "Союзмультфильм" номинациясендә 3 нче урынга лаек булды. (Җитәкчесе - Мөхәмәдиева Н.З.) Адиләне җиңүе белән котлыйбыз!