Бүген "Самостоятельные дети" проекты кысаларында "Будь готов! Скажи нет!" акциясе булып үтте. Акцияне оештыручылар җәмәгать урыннарына чыгып "Сез законны беләсезме?" викторинасы үткәрделәр, сәламәт яшәү рәвешен пропагандаладылар, наркотик матдәләр саклау, кулланган өчен җинаять җаваплылыгына тарту булачагы  һәм аның статьялары белән таныштырдылар.

4 нче сыйныф укучылары  өчен тиздән   имтиханнар.  Укучылар яңа стандартлар буенча  үзләренең алган  белемнәрен тикшерәчәкләр. Ә хәзер алар һәрбер фәннән янып- пешеп белемнәрен ныгыталар.”Китап белем чишмәсе” дип тикмәгә генә әйтмиләр икән.

            8 апрель көнне Шушмабаш урта мәктәбенең 9 һәм 11 класс укучылары Самигуллина Айгөл һәм Хасанова Гөлназ Казанның 6 гимназиясендә "Глобализация-реальность современного мира" дип исемләнгән республика фәнни-практик конференциясендә катнаштылар.Укучылар үзләренең проект эшен тәкъдим иттеләр, жюри әгъзаларының һәм конференциядә катнашучыларның күпсанлы сорауларына җавап бирделәр. Нәтиҗәдә кызлар III дәрәҗә дипломга лаек булдылар. (җитәкчеләре Самигуллина Ч.М., Хадиева Р.Р.) Моннан тыш үзләренең проектлары кергән тезислар җыелмасы брошюрасы белән бүләкләнделәр. Укучыларга яңа фәнни эзләнүләр, уңышлы иҗади проектлар юлдаш булсын !

Яз җитте. Тышта инде җылы, саф  һава. Без урамда тәнәфес вакытында  төрле кызыклы уеннар уйныйбыз, саф һава суларга чыгабыз. Ә бүген без уйнаганда , ябалак-ябалак кар яварга тотынды. Табигать  тагын да матурланды. Безгә дә бик күңелле булып китте. 

Бүген,8 апрель Арча мәдәният йортында Г.Камал тетры артистлары башкаруында "Авыл эте Акбай" дип исемләнгән спектакль булды.Спектакль эчтәлекле, киемнәре,сәхнә бизәлеше бик матур иде.Балаларга спектакль бик ошады

 7 апрель - Сәламәтлек саклау көне. Бу уңайдан башлангыч класс укучылары өчен "Яхшы һәм яман гадәтләр" дигән чара уздырылды. Сәламәт  булып үсү өчен спорт белән шөгыльләнү, дөрес туклану, көндәлек режимны үтәүнең мөһимлеге аңлатылды. "Сәламәт тәндә - сәламәт акыл" дигән мәкальне һәркем истә тотсын иде!

Бүген,7 апрель Арча педагогия көллиятендә студентлар һәм укучылар арасында "Наука и Мы"дип исемләнгән VIII фәнни-практик конференция булып узды. Төрле мәктәпләрдән килгән укучылар 10 секциягә бүленеп чыгышлар ясадылар.Безнең мәктәптән 8 класс укучысы Газизова Адилә уңышлы гына чыгыш ясап II дәрәҗәле дипломга лаек булды(җитәкчесе Г.Р.Вафина).Аны шушы җиңүе белән чын күңелдән тәбрик итәбез.

        Бүген, иртәнге линейкада, сыерчык оялары конкурсы җиңүчеләрен, интеллектуаль конкурс һәм фәнни-практик конференция, дистанцион олимпиадалар  җиңучеләрен, спорт өлкәсендә уңышлары булган укучыларны бүләкләү тантанасы булды. Тырышып куйган хезмәтләрнең нәтиҗәсе булу безне сөендерә, тагын да яңа эшләргә һәм җиңүләргә өнди! 

      4 апрель көнне мәктәбебез укытучылар коллективы, техник хезмәткәрләр, укучылар язгы өмәгә чыкты. Язгы кояш үзенең нурларын саран гына сипсә дә, безнең күңелләр шат: тиздән, бик тиздән чын, җылы яз җитәчәк!!!

3 нче апрель көнне 9 нчы сыйныфта әти-әниләр җыелышы булып узды. Җыелышның төп максаты ОГЭ алдыннан, яңадан бер тапкыр, әти-әниләрне имтиханнар тәртибе, аңа булган таләпләр белән таныштыру иде. Шулай ук, әти-әниләр, имтиханнар алдыннан укучыларга психологик яктан ничек ярдәм итү турында фикер алыштылар. Шушы теманы яктырткан видеоматериал белән танышып үттеләр. Әти-әниләр үзләрен борчыган сорауларгв җавап табып, киләчәктә дә мәктәп һәм гаилә арасында элемтәләрне даими тоту бурычын куеп  таралыштылар.