17 март көнне мәктәбебездә ата-аналар җыелышы булып узды. Гаилә белән мәктәпнең үзара элемтәсе, тәрбия эшендәге теләктәшлеге аларның бер үк максатка омтылуыннан. Әлеге уртаклык - мәктәпнең һәм гаиләнең уртак омтылышта булырга тиешлеге тәрбия эшенең гаять мөһим бер принцибы. Мәктәпнең, гаиләнең һәм җәмәгатьчелекнең бердәм эш итүе, педагогик җирлек буларак, балага һәркайда, һәрбер урында бер төрле, бер-берсенә каршы килмәгән теләкләр кую зарурлыгын күрсәтә.   Җыелышның беренче көн тәртибендә балигъ булмаган балалар белән эшләү һәм аларның хокукларын яклау комиссиясе сәркатибе Завялова Л.Н. яшьүсмерләрнең төрледән-төрле кызыксынулары, аларның заманага яраклашырга тырышулары, яңадан-яңа шөгыльләре турында әти-әниләргә үз фикерләрен җиткерде. Һәрвакыт балаларның үз-үзләрен тотышына, интернет  челтәрендә  кемнәр белән аралашуларына игътибарлы булырга кирәклеген әйтте. Икенче көн тәртибендә Россия Эчке эшләр министрлыгының Арча районы буенча бүлегенең балигъ булмаганнар белән эшләү бүлекчәсе өлкән инспекторы Һидиатуллина А.А. балигъ булмаган яшьтәгеләрнең хокук-бурычлары, алар арасында төрле тәртип бозулар булмасын өчен профилактик максатта нинди эшләр башкарырга кирәклеген аңлатты. ТР 71 нче номерлы Законын кабат искә төшерде, кисәтүләр ясады, язгы каникул чорына балалар өчен барлык куркынычсызлык кагыйдәләренең дә үтәлергә тиешлеген  искәртте. 3 нче көн тәртибендә Арча гуманитар техник техникумының укыту-тәрбия эшләре директор урынбасары Ахметханова А.Н. техникумга укырга керү шартлары, андагы  һөнәрләр, уңай мөмкинлекләр белән таныштырды.  Мәктәбебез директоры Сабирҗанова Н.Б. алда торган ОГЭ, ЕГЭ га әзерлек, аны үткәрү тәртибе, андагы үзгәрешләрне кабат ата-аналарга җиткерде. Укучыларны кайнар аш белән тәэмин итү мәсьәләсе дә каралды. Ата-аналар җыелышын укучылар көче белән әзерләнгән концерт тагын да ямьләндереп җибәрде. Җыелышның калган өлеше классларда дәвам итте.