Бүген Яңа Кырлай урта мәктәбендә "Тукайга ияреп" районара яшь иҗатчылар бәйгесенең йомгаклау туры үтте. Анда безнең мәктәптән дә ике укучының эше катнашты. Нәтиҗәдә, "Тукайга ияреп шигырьләр, мәсәлләр язу" номинациясендә  6 нчы сыйныф укучысы Гобәйдуллина Нәзилә "Гран-при" иясе булды (Җитәкчесе татар теле һәм әдәбияты укытучысы А. М. Замалиева), ә 7 нче сыйныфтан Минҗанова Фирүзә шул ук номинациядә 3 урын алды ( Җитәкчесе татар теле һәм әдәбияты укытучысы Г. Р. Җәләлетдинова). Афәрин, кызлар, сезгә киләчәктә дә иҗади уңышлар телибез!

Язның беренче бәйрәме 8 март уңаеннан педагог- организатор А. М. Замалиева 5-6 нчы сыйныф кызлары арасында "Ягез әле, кызлар!" бәйгесе уздырды. Бәйгедә кызлар төрле сынаулар үтте, һәр төр ярышта үз осталыкларын күрсәттеләр. Нәтиҗәдә 6 нчы сыйныфтан "Яз" командасы 1 урын, 5 нче сыйныфтан "Чәчкәләр" командасы 2 урынга ия булды. Афәрин, кызлар! Сезгә киләчәктә дә уңышлар телибез.

3 нче март көнне, 5 - 6 класс укучылары катнашында, “Үз уеным” дип исемләнгән уен үткәрелде. Ярышта  укучылар технология дәресләрендә алган белемнәре буенча көч сынаштылар.

Сораулар “Кулинария”,  “Тегү машинасында башкарылган җөйләр”, “Көнкүрешкә кагылышлы мәкал ьләр”, “Проект”. “Бәйләү”, “Чигү”  темалары буенча  төзелгән иде. 

Кичә бик эчтәлекле үтте.

Бүген, 2 нче март көнне, технология укытучысы Сәләхиева Миләүшә Радик кызы, 5 класс укучылыры белән, “Иртәнге аш өчен өстәл  әзерләү”  темасына ачык дәрес  үткәрде. Дәрестә укучылар этикет төрләре, аны дөрес  үтәү кагыйдәләре белән таныштылар. Өстәл  сервировкаларга, приборлар белән дөрес эш итәргә, өстәл артында дөрес утыру  кагыйдәләренә өйрәнделәр. Һәр укучы салфеткадан төрле фигуралар эшләп, мастер – класс күрсәтте. Дәрес кызыклы һәм мавыктыргыч үтте.

 21 нче февраль – Халыкара  туган тел көне уңаеннан, Кышкар башлангыч мәктәбендә китапханә хезмәткәре Ибрагимова Г.Р белән берлектә  “ Тел дигән дәрья бар” исемендәге тәрбия сәгате үткәрелде.  Шагыйрьләрнең тел турындагы шигырьләре укылды һәм мәкальләр искә төшерелде.

7-8 класс укучылары катнашында "Күңелле стартлар" уены үтте. Һәр командада бишәр кеше катнашты. Үзләренең исемнәре, девизлары белән таныштырдылар. Төрле эстафеталар буенча җитезлектә, тизлектә үзләрен сынап карадылар. Спорт, сәламәтлек буенча сорауларга  җавап бирделәр. 8 класс командасы 1 урын, 7 класс 2 урын, 9 класс 3 урын алдылар. 

Мәктәбебезнең тимурчылар отряды актив эш алып бара. Хәрби-патриотик айлык кысаларында да өлкәннәр читтә калмады. Укучылар аларның өйләрендә булды, йорт эшләрендә булыштылар. Олылар балаларның эшеннән канәгать калды, рәхмәтләрен җиткерделәр.
 

5-6 нчы класс укучылары катнашында "Күңелле стартлар" уены үтте. Укучылар төрле уеннар барышында үзләрен җитезектә, тизлектә сынадылар. 

Хөрмәтле коллегалар!

Сезне 23 нче февраль - Ватанны саклаучылар көне белән котлыйбыз! Сезгә озын гомер, нык сәламәтлек, эшегездә зур уңышлар телибез.

   Яшәрегез яшь өстәлгән саен,

Яшәү булсын сезгә күңелле.

Безнең өчен ныклы терәк бит сез

Иң зур бәхет шушы түгелме?

  Ходай сезгә камил акыл бирсен,

Җиткерәбез сезгә теләкне

Олы бәйрәмегез уңаеннан

Кабул итегез сез рәхмәтне.

Мәктәбебездә  "Ватан терәге - ир-егет" исеме астында Ватан саклаучылар көненә багышланган бәйрәм концерты булды. Чарада Әфган сугышында катнашкан якташларыбыз катнашты. Алар үзләре үткән дәһшәтле еллар турында сөйләделәр, үсеп килүче яшь буынга үзләренең теләкләрен җиткерделәр. 8 нче класс җитәкчесе Миләүшә Радиковна җитәкчелегендә укучыларыбыз башкарган җырлар, биюләр  һәркемне дулкынландырды.