Бүген мәктәбебездә  "Аҗаган" уены үткәрелде.  Әлеге чара хәрби-патриотик айлык кысаларында үтте. Укучылар ике командага бүленеп, сугышчан җырлар җырлап, хәрби стройда йөрү осталыкларын кхрсәткәннән соң, төрле спорт ярышларында, хәрби уеннарда көч сынашты.

Башлангыч сыйныф укучылары "Муса Җәлил исеме үлемсез" дигән фильм карадылар. Муса Җәлил - ялкынлы шигырьләр авторы, Ватаныбыз азатлыгы өчен көрәшкән кыю солдат ул. Патриот шагыйрь фашист тоткынлыгына эләгеп тә, рухи ныклыгын югалтмый, курку белмичә дошманга каршы көрәш алып бара.
Сугыш  чорында күпме авырлыклар күрүенә карамастан, Муса Җәлилнең күңел төшенкелегенә бирелмәве, үз Ватанының герой улы булуы, концлагерьда вакытта авыр шартларда мәңге үлмәс, мәгънәле шигырьләр язуы экранда чагылдырылган сурәтләр аша тасвирланды. Җәлилнең тормышы җырга тиң. Җыр үлемсез булган кебек, аның шигырьләре, исеме дә үлемсез.

Бүгенге кичә балаларда бөек шагыйребез белән горурлану хисе уяту, аның иҗаты турында яшь  буынны мәгълүматлы итү,  туган илгә карата мәхәббәт тәрбияләү максатында оештырылды. Җәлил иҗат иткән шигырьләрне  укучылар чын күңелдән  илһамланып, төрле телләрдә башкардылар.