Бүген батыр шагыйребез - татар халкының бөек улы Муса Җәлилне искә алдык. Аның тууына 120 ел булган көндә балалр өчен язылган шигырьләрен искә төшердек. Аның батырлыгын, рухи көчен, ватанга тугрылыгын онытырга хакыбыз юк.

15 февраль — Бөтендөнья сәламәт яшәү рәвеше көне. Бу көн безгә үз тәнебезгә һәм рухыбызга кайгыртучан булырга искәртә. Сәламәт тормыш — бу дөрес туклану, физик активлык, начар гадәтләрдән баш тарту һәм эчке гармония. Бәләкәй генә адымнар — иртәнге зарядка, саф һавада йөрү, режим — озак һәм сыйфатлы гомергә нигез сала. Үзегезгә һәм якыннарыгызга сәламәтлек теләп, бу көнне яхшы гадәтләр кертүгә багышлагыз. Сәламәт булу мода түгел, ә бәясе зур кыйммәтлек.

Бүген Актаныш гомуми үсеш бирүче 4нче балалар бакчасында "Яшь педагог+остаз"  республика бәйгесе узды. Бәйгедә бакчабызның югары категорияле тәрбияче-остазы Лотфуллина Ләйсән Глүс кызы һәм яшь педагог Вагизова Алиса Фәндәс кызы катнашты. 

Бүген бакчабызда "Йолдызлык - 2026" бәйгесенең район этабына сайлап алу туры үтте. Мәртәбәле жюри каршында бакчабызның 62 нәни йолдызы чыгыш ясады. Аларга киләчәктә дә уңышлар теләп калабыз.

18 гыйнварда балаларның иң яраткан бәйрәмнәренең берсе - Бөтендөнья Кар бабай көне билгеләп үтелә.  Бу кар символыннан башка елның салкын вакытын күз алдына китерү кыен. Кар бабайларын әвәләү-безгә борынгы заманнардан килеп җиткән кышкы балалар уены. Кар бабайның хәзерге кыяфәте – өч кар шары һәм борын-кишер – 19 гасыр ахырынан башлана. Һәм мондый Кар бабайлар күп кенә «карлы» илләрдә Раштуа һәм Яңа ел атрибутларына әверелде.

Бакчабызда Яңа ел бәйрәмнәре дәвам итә. Балалар Кыш бабай килүгә шигырьләр, җырлар-биюләр өйрәнделәр. Убырлы карчык, Шүрәле, Төлке, Бүре һәм башка әкият геройларының биремнәрен үтәп Кыш бабай һәм Кар Кызының килер юлларын якынайттылар. Озын юллар үтеп килгән Кыш бабай белән бергәләп балалар күңел ачтылар.

Балаларны юл йөрү кагыйдәләренә өйрәтү - бик мөһим юнәлешләрнең берсе. Тәрбиячебез Альбина Мөдәрисовна балалар белән кечкенәдән үк бу юнәлештә эш алып бара - әти-әниләр өчен тематик җыелышлар, балалар белән берлектә әзерләнгән күңел ачулар моның ачык мисалы. Районыбызда "Юл йөрү кагыйдәләре һәм театр" бәйгесендә икенче кечкенәләр төркеменнән Насрыевлар гаиләсе  "Йомры икмәк маҗаралары"н сәхнәләштереп мактаулы 2нче урынга лаек булдылар. Насрыевлар гаиләсен һәм тәрбиячеләре Хабибуллина А.М.  чын күңелдән котлыйбыз!

Бүген бакчабызда "Мәктәпкәчә яшьтәге балаларды беренчел инженерлык күнекмәләре тәрбияләү" темасы астында район тәрбиячеләренең методик берләзшмә утырышы узды.Балалар бакчасында ПиктоМир уеннарын куллану буенча мәктәпкә әзерлек төркемендә Гильфанова З.Р., зурлар төркемендә Лотфуллина Л.Г., уртанчылар төркемендә Галимарданова Г.Р. белем бирү эшчәнлекләре күрсәттеләр. "ПиктоМир - уйныйбыз һәм өйрәнәбез" темасына өлкән тәрбияче Хисматуллина Л.Ф. чыгышы балалар бакчасында ПиктоМир уен платформасы куллануны тәфсилләп ачты.

Бүген Актаныш гомуми үсеш бирүче 3нче балалар бакчасында республикакүләм "Ел тәрбиячесе" һөнәри бәйгесенең район этабында  югары квалификацион категорияле тәрбияче Хабибуллина Альбина Мөдәрис кызы бакчабыз данын яклап чыгыш ясады.

Россиядә ноябрь аеның соңгы якшәмбесендә бик матур бәйрәм – Әниләр бәйрәме билгеләп үтелә. Шул уңайдан  балалар бакчасында «Әниләрне зурлыйбыз» дип исемләнгән бәйрәм чарасы узды.