Тиздән барлык балаларның да көтеп алган бәйрәме - Яңа ел. Һәркем Яңа елда ниндидер могҗиза көтә: Кыш бабай нинди бүләкләр бирер, бәйрәмгә кемнәр килер - менә шул әлеге бәйрәмне тылсымлы итә дә инде. Олы Арташ төп мәктәбендә Яңа елга әзерлек эшләре дәвам итә. Һәр сыйныф иҗади эшли, һәркемнең үз чыгышын иң яхшысы итеп күрәсе килә. Укучылар арасында рәсем конкурсы да игълан ителде. Эшләргә йомгак бәйрәмдә ясалачак һәм иң яхшы эшләргә махсус бүләкләр каралган.

25нче декабрь көнне 2 нче чирек нәтиҗәләренә багышланган педагогик киңәшмә узды.Киңәшмәдә класс җитәкчеләре чыгыш ясады, һәр сыйныфның  өлгереш һәм уку сыйфаты билгеләнде. Укыту-тәрбия өлкәсендә туган мәсьәләләр буенча фикер алышулар үткәрелде. Киңәшмәнең икенче өлешендә информатика укытучысы Гайбадуллин И.Б. укытучыларны интернет челтәрендә мәгълүмати объектлар белән эшләү алымнарын өйрәтте.

Арташ яклары элек-электән көрәшчеләре белән дан тота. 7нче сыйныф укучысы Каюмов Нияз да көрәш түгәрәгенә яратып йөри, бик күп ярышларда катнаша. Бу көннәрдә Сабада узган көрәштә катнашып 1нче, Теләчедә булган көрәштә катнашып 3нче урынны яулады. Уңышларың белән,Нияз1

Бүгенге тәрбия сәгатьләре "Шәфкатьлелек" темасына багышланды. Һәр сыйныф җитәкчесе эчтәлекле, балалар өчен әһәмиятле дәресләр күрсәтте.

“Балалар - ветераннарга” акциясе кысаларында 8нче сыйныф укучылары мәктәптә эшләп чыккан Фәния апаның өендә булдылар. Ул яши торган өй тирәләрен кардан чистарттылар. Фәния апа укучыларга чын күңелдән рәхмәт әйтте. Хәзерге яшь буынга сугыш афәтләре күрергә язмасын дип теләде.

Бадминтончы егетләребез Ахмадуллин Рифат(3нче урын), Галимуллин Фаяз(3нче урын) һәм Мөхәммәтҗанов Рәис (2нче урын) Биектау районында үткәрелгән Бадминтон ярышында катнашып кайттылар. Уңышларыгыз белән,егетләр!