Кадерле укытучылар,мәктәп хезмәткәрләре,укучылар! Сезне чын күңелдән якынлашып килүче Яңа 2016 нчы ел белән котлыйбыз. Яңа елда саулык-сәламәтлек, гаиләгездә татулык һәм тынычлык, тормышыгызда һәм эшегездә, укуыгызда яңа уңышларга ирешүегезне телибез. Яңа елны, туган һәр яңа көнне елмаеп, зур өметләр һәм хыяллар белән каршы алыгыз! Күңелегез саф, хисләрегез эчкерсез, хыялларыгыз якты һәм матур булсын.

27 нче декабрь көнне мәктәбебездә укучыларыбыз тарафыннан әзерләнгән Яңа ел тамашалары булып үтте. Тамашага әти – әниләр, әбиләр килгән иде. Бәйрәм бик күңелле үтте. Һәр класс узенчәлекле костюмнар һәм чыгышлар әзерләделәр, бик матур концерт номерлары да тәкъдим иттеләр. Яңа ел бәйрәме һәркем күңелендә кызыклы тамашалары белән истә калды. Соңыннан һәр балага бүләкләр тапшырылды. Алар исеменә мәктәп директоры тарафыннан җылы сүзләр әйтелде.

Тиздән барлык балаларның да көтеп алган бәйрәме - Яңа ел. Һәркем Яңа елда ниндидер могҗиза көтә: Кыш бабай нинди бүләкләр бирер, бәйрәмгә кемнәр килер - менә шул әлеге бәйрәмне тылсымлы итә дә инде. Олы Арташ төп мәктәбендә Яңа елга әзерлек эшләре дәвам итә. Һәр сыйныф иҗади эшли, һәркемнең үз чыгышын иң яхшысы итеп күрәсе килә. Укучылар арасында рәсем конкурсы да игълан ителде. Эшләргә йомгак бәйрәмдә ясалачак һәм иң яхшы эшләргә махсус бүләкләр каралган.

25нче декабрь көнне 2 нче чирек нәтиҗәләренә багышланган педагогик киңәшмә узды.Киңәшмәдә класс җитәкчеләре чыгыш ясады, һәр сыйныфның  өлгереш һәм уку сыйфаты билгеләнде. Укыту-тәрбия өлкәсендә туган мәсьәләләр буенча фикер алышулар үткәрелде. Киңәшмәнең икенче өлешендә информатика укытучысы Гайбадуллин И.Б. укытучыларны интернет челтәрендә мәгълүмати объектлар белән эшләү алымнарын өйрәтте.

Арташ яклары элек-электән көрәшчеләре белән дан тота. 7нче сыйныф укучысы Каюмов Нияз да көрәш түгәрәгенә яратып йөри, бик күп ярышларда катнаша. Бу көннәрдә Сабада узган көрәштә катнашып 1нче, Теләчедә булган көрәштә катнашып 3нче урынны яулады. Уңышларың белән,Нияз1

Бүгенге тәрбия сәгатьләре "Шәфкатьлелек" темасына багышланды. Һәр сыйныф җитәкчесе эчтәлекле, балалар өчен әһәмиятле дәресләр күрсәтте.