16 нчы январь көнне мәктәбебездә “Дәресләрдә укучыларның регулятив һәм коммуникатив эшчәнлеген үстерү” темасына педагогик киңәшмә узды. Киңәшмәдә ноябрь педагогик киңәшмәсе карарлары үтәлеше, дәресләрдә укучыларның регулятив һәм коммуникатив эшчәнлеген үстерү, II чирек йомгаклары һәм алда торган бурычлар, укучыларның имтиханнарга әзерлеге, хокук бозу очракларын кисәтү буенча эшчәнлек нәтиҗәләре  каралды.

Мәктәбебезнең ЮИД отряды  юл йөрү кагыйдәләре буенча үткәрелгән район конкурсында уңышлы чыгыш ясадылар. Укучыларыбызга алга таба да уңышлар телибез!

Балаларны уен аша тәрбияләү зур роль уйный. Менә шул уен аша дөньяны танып белсеннәр, бер-берсе белән аралашсыннар, уенда хыялларын чынга ашырсыннар өчен  тәнәфесләрдә укучыларга өстәл уеннары тәкъдим ителә. Уен аша укучыларның  сөйләмнәре камилләшә, матур гадәтләре, белемнәре арта.

 Үзенең салкыннарын, кар-бураннарын ияртеп кыш килде.Бөтен дөньяда аклык, сафлык хөкем сөрә. Аяк астында яңа яуган кар шыгыр-шыгыр килә. Өр-яңа җирләрне үзләштергәндәй, беркем дә аяк басмаган яңа яуган карга эз салып баруы − үзе бер могҗиза.Яңа яуган кар өстендә тормышның бар сулышы ярылып ята. Урам буйлап узганда, кемнеңдер өенә эз керүен, кайсыныңдыр урам буйлап узуын күрәсең. Әнә ерак түгел, шаярып уйнашкан эт эзләре ярылып ята, аңа каршы якта − ат чанасы эзе. Мондый хозурлык бары кыш көне генә була ала. Укучыларыбызның туган якның матурлыгын сурәтләгән фотоларыннан күргәзмә оештырдык. 

2 нче январь көнне Носы мәктәбе шугалагында укучылар һәм әти-әниләр катнашында "Күңелле уеннар" үткәрелде. Кыш бабай һәм Кар кызы  кызыклы уеннары һәм бүләкләре белән балаларны, әти-әниләрне сөендерде.

Дуслар! Якынлашып килүче Яңа еллар белән! Аллаһы Тәгалә барыбызга да хәерлесен насыйп итсен. Бу дөньяда яхшылык эшләү, игелек кылу җирдә ятмый, шуңа күрә һәрберебезнең күңелендә изгелек, чисталык, сафлык яшәсен! Бары шул вакытта гына кеше бу дөньяда үзен бәхетле итеп тоячак! Көтелмәгән куанычлар килсен һәммәбезгә!

Хәсәншәех төп мәктәбендә узган шашка һәм шахмат буенча профсоюз ярышларында мәктәбебезнең укытучылары уңышлы чыгыш ясадылар. Физкультура укытучысы Галиев Б.И. шашка ярышында 1 урынны, рус теле һәм әдәбияты укытучысы Файзрахманова Л.Р. шахмат буенча 3 урынны яуладылар. Аларны җиңүләре белән котлыйбыз, киләчәктә уңышлар телибез. 

Боз чанага утырып,

Күчтәнәчләр тутырып

Бабай килгән кунакка,

Кунакка Сәрдәбашка

Сәрдәбаш башлангыч мәктәбе укучылары Яңа ел бәйрәмен авыл клубында үткәрәләр. Барлык авыл халкына бәйрәм бүләк итәләр. Бәйрәмгә зур җаваплылык тоеп әзерләнәләр. Беркем дә читтә калмый. Һәр баланың үзен күрсәтәсе, әти-әниләрне, туганнарны, дусларны, күршеләрне  шатландырасы килә. Барлык изге теләкләр тормышка ашсын иде.

26 нчы декабрь көнне мәктәбебезнең ике укучысы: 6 класстан Абдуллин И., 7 класстан Николаева Р. Арча шәһәрендә үткәрелгән Чыршы бәйрәмендә булып кайттылар. Бәйрәмне оештыручыларга һәм җитәкчеләребезгә зур рәхмәтебезне белдерәбез.

Бүген 9 класс укучылары белән математикадан экзаменга әзерлек үткәрелде.