Район күләмендә үткәрелгән мәктәп ярминкәсендә без дә актив катнаштык. Мәктәп бакчасында үстерелгән яшелчә, җиләк-җимешләрне Арча халкы яратып кабул итте.

27нче августта Арчаның "Җиңү паркы"нда чәчәк күргәзмәсе оештырылды. Безнең мәктәпнең "Вакыйгалар кыры" дип исемләнгән күргәзмә бар халыкны үзенә тартып торды, бик теләп уенда да катнаштылар, сорауларга җавап бирделәр.

25 августта Арчада укытучыларның август киңәшмәсе булды. Анда муниципаль район башлыгы Илшат Нуриев, ТР мәгариф һәм фән министрлыгының бүлек җитәкчесе Роза Шәяхмәтова катнашты. Киңәшмә башланганчы алар мәктәпләрнең эшчәнлеге белән таныштылар һәм укучыларның чыгышларын тыңладылар. Безнең мәктәптән "Йолдызлык - 2016" Россиякүләм олимпиадада җиңү яулаган укучыбыз Солтанов Инсаф һәм "Чистые берега" Республикакүләм бәйге җиңүчесе Гайфуллина Раилә катнашты. Район мәгариф идарәсе җитәкчесе Зөлфәт Дәүләтбаев ирешелгән уңышлар, алда торган бурычлар турында чыгыш ясады. Укучыларга белем һәм тәрбия бирүне яхшырту юллары турында эшлекле сөйләшү булды. 

«Арча ягы - кунакчыл як».  Бу гыйбарәнең хак икәненә 22 нче август көнне Пермь, Курган,Төмән, Ульяновск өлкәсеннән, Казахстаннан, Чувашия Республикасыннан һәм башка төбәкләрдән  килгән  татарлар тагын бер кат инангандыр.  Районыбызга кем  генә аяк басмасын, аның Тукай йөргән эзләрдән узасы, аны сыендырган, аның ятимлеген аз гына да булса киметергә тырышкан игелекле гаилә яшәгән Яңа Кырлай авылын күрәсе килә. Бу көнне дә милләттәшләребез  Яңа Кырлай авылында кунакта булдылар.Иң беренче кунакларны Яңа Кырлай мәктәбе кабул итте. Укучылар көче белән оештырылган  каршы алу өлеше дә кунакларда бик җылы тәэсирләр калдырды.   Мәктәп директоры Энҗе Фәрук кызы кунакларны мәктәп белән, заманча җиһазландырылган татар теле һәм әдәбияты кабинеты белән, укучылар кулы белән ясалган кул эшләре һәм күргәзмәләр белән таныштырды.   Тукай туган якка сәяхәт Г.Тукайның Яңа Кырлайдагы музеенда дәвам итте. Милләттәшләребез һәр экспонат белән җентекләп таныштылар. Алган тәэсирләре белән уртаклашу чәй өстәле артында дәвам итте. Бу көнне табигать тә ерак араларны  якын итеп килгән  милләттәшләребезгә мәрхәмәтле булды: кояш эссесен басып, җиләс җил исте. Регионара хезмәттәшлек итү һәр ике як өчен дә файдалы һәм дәвамлы булсын иде.

 Районыбыз укытучылары узган уку елына йомгак ясап , 2016-2017 уку елына мөһим  бурычларны билгеләү максатыннан август киңәшмәләрен башлап  җибәрделәр. Шундый киңәшмәнең берсе-Түбән Мәтәскә урта мәктәбендә математика,физика һәм информатика укытучылары өчен булды.

Үрнәк бистәсендә оештырылган “Шатлык” лагереның 3 нче сменасы да тәмамланды. Ул үзенә бу юлы районыбызның сәләтле балаларын җыйды. Безнең мәктәптән дә әлеге сменада 5 укучы ял итеп кайтты. Баланың табигать тарафыннан бирелгән сәләтен үстереп, аны иҗади шәхес итеп тәрбияләү - заман таләбе . Шуны истә тотып, бу сменада ял итүче укучылар белән эшчәнлек үзенчәлекле итеп оештырылды. Күңелле ял итү минутлары, тәмле ашлар, төрле чаралардан тыш, балалар үзләре теләгән фәннәр буенча дәресләрдә булып, белемнәрен тагын да тирәнәйтә алды. Укучылар өчен татар һәм рус теле, инглиз теле,математика, химия, тарих, җәмгыять белеме фәннәре буенча дәресләр үткәрелде.  Укучылар бик теләп, үзләре яраткан фән нигезләрен өйрәнделәр. Шушы тәртиптә алар көн саен 2 сәгать дәвамында якты матур сыйныф бүлмәләрендә шөгыльләнделәр. Укучыларыбыз лагерьдан бик канәгать калдылар.

Бүген мәктәптә чираттагы өмә үтте. Мәктәп хезмәткәрләре чүпләрне җыйдылар, мәктәп территориясен чүп үләннәреннән арындырдылар.

Пришкольный участок радует глаз! Надеемся осенью получить хороший урожай. Для этого наши учащиеся в течение всего лета пропалывают и поливают грядки, убирают сорняки.

Быел да мәктәп алды аллы-гөлле чәчәкләргә күмелде.